ശബരിമല നട നാളെ തുറക്കും; മണ്ഡലകാല തീർത്ഥാടനത്തിന് തുടക്കമാകും

ശബരിമല മണ്ഡല-മകരവിളക്ക് തീർത്ഥാടനത്തിനായി ക്ഷേത്രനട നാളെ വൈകുന്നേരം 5 മണിക്ക് തുറക്കും. തന്ത്രിയുടെ സാന്നിധ്യത്തിൽ മേൽശാന്തി ശ്രീലകത്ത് ദീപം തെളിയിക്കും.

പുതിയ ശബരിമല, മാളികപ്പുറം മേൽശാന്തിമാരുടെ അവരോധിക്കൽ ചടങ്ങ് നാളെ വൈകുന്നേരം 6:30-ന് നടക്കും. വൃശ്ചികം ഒന്നായ മറ്റന്നാൾ പുലർച്ചെ പുതിയ മേൽശാന്തിമാർ നട തുറക്കുന്നതോടെ 41 ദിവസം നീളുന്ന മണ്ഡലകാല പൂജകൾക്ക് തുടക്കമാകും.

ഡിസംബർ 27-നാണ് മണ്ഡലപൂജ. നാളെ ഉച്ചയ്ക്ക് 12 മണിക്ക് ശേഷം മാത്രമേ നിലയ്ക്കലിൽ നിന്ന് ഭക്തരെ പമ്പയിലേക്ക് കടത്തിവിടുകയുള്ളൂ.