അഴിമതിക്കാർ പുറത്ത്

എക്സൈസിൽ വൻ ശുദ്ധീകരണം; വിജിലൻസിലും ഇന്റലിജൻസിലും ‘അഴിമതിക്കാർ’ പുറത്തേക്ക്

കേരളത്തിലെ 14 ജില്ലകളിലുമുള്ള എക്സൈസ് വിജിലൻസ്, ഇന്റലിജൻസ് വിഭാഗങ്ങൾ പുനഃസംഘടിപ്പിക്കാൻ തീരുമാനം. വിശ്വാസയോഗ്യരും അന്വേഷണ മികവുള്ളവരുമായ ഉദ്യോഗസ്ഥരെ നിലനിർത്തി, ക്രമക്കേടിൽ പങ്കാളികളായവരെ ഒഴിവാക്കുന്ന പട്ടിക എക്സൈസ് കമ്മിഷണർ തയ്യാറാക്കിയതായി റിപ്പോർട്ട്.

കോട്ടയം മുൻ ഡെപ്യൂട്ടി എക്സൈസ് കമ്മിഷണർക്കെതിരെ പരാതിയും തെളിവുകളും ഉണ്ടായിട്ടും ആലപ്പുഴയിലും കോട്ടയത്തും ഇന്റലിജൻസ് വിഭാഗം വേണ്ടവിധം ഇടപെട്ടില്ലെന്നാണ് കണ്ടെത്തൽ. ബാറുകൾ നേരത്തെ തുറക്കുന്നതും വൈകി അടയ്ക്കുന്നതും, മാസപ്പടി-സമ്മാന ഇടപാടുകളും ഉൾപ്പെടെയുള്ള കാര്യങ്ങളിൽ ചില ഉദ്യോഗസ്ഥർ മൗനം പാലിച്ചതായും റിപ്പോർട്ടിൽ പറയുന്നു. മറ്റ് മൂന്ന് ജില്ലകളിലെ ഉന്നത ഉദ്യോഗസ്ഥരും ഇപ്പോൾ നിരീക്ഷണത്തിലാണ്.

“ആരുടെയെങ്കിലും പണം കൊണ്ട് ജീവിക്കാമെന്ന് കരുതിയാൽ രക്ഷയുണ്ടാകില്ല” എന്ന കർശന സന്ദേശവുമായി എക്സൈസ് മന്ത്രി എം. ലിജു. ഇനി അഴിച്ചുപണി പട്ടികയിൽ ഒതുങ്ങുമോ, വലിയ ‘തിമിംഗലങ്ങളിലേക്കും’ അന്വേഷണം എത്തുമോ എന്നതാണ് കാണേണ്ടത്.