ഹിമാലയത്തിലെ താപനില വർധന ദുരന്തസാധ്യത കൂട്ടുന്നു

മഴയില്ലാതെ ഇരച്ചെത്തിയ പ്രളയം; നേപ്പാളിനെ നടുക്കിയ ‘ഗ്ലോഫ്’ എന്താണ്?

കനത്ത മഴയില്ലാതിരുന്നിട്ടും നേപ്പാൾ–ടിബറ്റ് അതിർത്തിയിലെ ഭോട്ടെകോശി നദിയിലൂടെ അതിവേഗം ഇരച്ചെത്തിയ വെള്ളപ്പാച്ചിൽ ഗ്രാമങ്ങളും റോഡുകളും പാലങ്ങളും ജലവൈദ്യുത പദ്ധതികളും തകർത്തു. പ്രാഥമിക പരിശോധനയിൽ ഹിമപാതവും പാറക്കെട്ടുകളും ചേർന്നുണ്ടായ ഇടിച്ചിൽ ലെൻഡെ നദിയുടെ ഒഴുക്ക് തടഞ്ഞ് വൻതോതിൽ വെള്ളം കെട്ടിനിന്നതാകാം ദുരന്തത്തിന് കാരണമെന്നാണ് ശാസ്ത്രജ്ഞരുടെ വിലയിരുത്തൽ. ഗ്ലേഷ്യൽ തടാകം പൊട്ടിയതിന്റെ പങ്കും പരിശോധിക്കുന്നുണ്ട്.

ഹിമാനികൾ ഉരുകി രൂപപ്പെടുന്ന തടാകങ്ങളുടെ സ്വാഭാവിക തടയണ പെട്ടെന്ന് തകർന്നാൽ ലക്ഷക്കണക്കിന് ഘനമീറ്റർ വെള്ളം, മഞ്ഞ്, പാറ, ചെളി എന്നിവ താഴ്‌വരയിലേക്ക് കുതിച്ചെത്തും. ഇതാണ് Glacial Lake Outburst Flood — GLOF. സാധാരണ പ്രളയത്തേക്കാൾ മുന്നറിയിപ്പിന് സമയം കുറവായതിനാൽ നാശശേഷിയും കൂടുതലാണ്. ഹിമാലയത്തിലെ താപനില വർധനയും ഹിമാനികളുടെ ഉരുകലും ഇത്തരം ദുരന്തങ്ങളുടെ അപകടസാധ്യത ഉയർത്തുന്നുവെന്ന മുന്നറിയിപ്പും വീണ്ടും ശക്തമാകുകയാണ്.