മലപ്പുറം, കാസർകോട് സ്വദേശികൾ മരിച്ചു

ഒരുമിച്ചെത്തി, ഒരുമിച്ച് മടങ്ങി; അബുദാബി അപകടത്തിൽ രണ്ട് മലയാളി സുഹൃത്തുക്കൾക്ക് ദാരുണാന്ത്യം

വർഷങ്ങളായുള്ള സൗഹൃദത്തിന്റെ വഴികളിൽ ഒന്നിച്ചു നടന്ന രണ്ട് മലയാളി പ്രവാസികൾ അബുദാബിയിലെ വാഹനാപകടത്തിൽ ഒരുമിച്ച് വിടപറഞ്ഞു. മലപ്പുറം തൃപ്പനച്ചി സ്വദേശി നാറാണത്ത് ഹംസ കോക്കഞ്ചേരി (53), കാസർകോട് ബേക്കൽ മൗവ്വലിൽ താമസിക്കുന്ന മുഹമ്മദ് അഷ്റഫ് (54) എന്നിവരാണ് മരിച്ചത്. അടുത്തിടെയാണ് ഇരുവരും സന്ദർശക വീസയിൽ വീണ്ടും യുഎഇയിലെത്തിയത്.

ഞായറാഴ്ച രാത്രി അബുദാബിയിൽ നിന്ന് ദുബായിലേക്ക് മടങ്ങുന്നതിനിടെ ഇവർ സഞ്ചരിച്ച കാർ വഴിയരികിൽ നിർത്തിയിട്ടിരുന്ന വാഹനത്തിൽ ഇടിച്ചു. പിന്നാലെയെത്തിയ സ്കൂൾ ബസും കാറിൽ ഇടിച്ചതോടെ വാഹനം രണ്ട് വാഹനങ്ങൾക്കിടയിൽപ്പെട്ട് തകർന്നു. ഹംസയും അഷ്റഫും സംഭവസ്ഥലത്തുതന്നെ മരിച്ചു; കാർ ഓടിച്ചിരുന്ന ശ്രീലങ്കൻ സ്വദേശിക്ക് ഗുരുതരമായി പരുക്കേറ്റു. പ്രവാസജീവിതത്തിന്റെ സന്തോഷങ്ങളും പ്രയാസങ്ങളും പങ്കിട്ടിരുന്ന ദീർഘകാല സുഹൃത്തുക്കളുടെ ഒരുമിച്ചുള്ള വേർപാട് കുടുംബങ്ങൾക്കും സുഹൃത്തുക്കൾക്കും വലിയ നൊമ്പരമായി.