ടിവികെയുടെ കേരള അധ്യക്ഷനായി ദേവൻ; വിജയുമായുള്ള കൂടിക്കാഴ്ച ഉടൻ; ബിജെപി വിട്ട നടൻ ദേവൻ തമിഴക വെട്രി കഴകത്തിന്റെ കേരള സംസ്ഥാന അധ്യക്ഷനായേക്കും

ടിവികെയുടെ കേരള അധ്യക്ഷനായി ദേവൻ; വിജയുമായുള്ള കൂടിക്കാഴ്ച ഉടൻ

ബിജെപി വിട്ട നടൻ ദേവൻ, നടൻ വിജയ് നേതൃത്വം നൽകുന്ന തമിഴക വെട്രി കഴകത്തിന്റെ (ടിവികെ) കേരള സംസ്ഥാന അധ്യക്ഷനായേക്കും. ഇതുസംബന്ധിച്ച് ദേവനും ടിവികെ നേതാക്കളും തമ്മിലുള്ള ആദ്യഘട്ട ചർച്ചകൾ പൂർത്തിയായതായാണ് റിപ്പോർട്ട്. സെപ്റ്റംബർ 10ന് ശേഷം ചെന്നൈയിലെത്തി വിജയുമായി നേരിട്ട് കൂടിക്കാഴ്ച നടത്തുമെന്നും അതിനുശേഷമാകും അന്തിമ തീരുമാനവും ഔദ്യോഗിക പ്രഖ്യാപനവുമെന്നാണ് ദേവൻ വ്യക്തമാക്കിയത്.

ദേവനെ ടിവികെയുമായി അടുപ്പിക്കുന്നതിൽ നടി പ്രിയങ്ക മധ്യസ്ഥയായതും ശ്രദ്ധേയമാണ്. ടിവികെയുടെ തമിഴ്നാട് ഘടകത്തിലെ രണ്ട് നേതാക്കൾ പ്രിയങ്കയ്ക്കൊപ്പം ദേവന്റെ ചാലക്കുടിയിലെ വീട്ടിലെത്തി മൂന്ന് മണിക്കൂറോളം ചർച്ച നടത്തി. പിന്നീട് പാർട്ടിയിലെ മുതിർന്ന നേതാക്കളുമായി ഓൺലൈൻ ചർച്ചയും നടന്നു. കേരളത്തിൽ പാർട്ടി ശക്തിപ്പെടുത്തുന്നതും സഖ്യസാധ്യതകളും ചർച്ചയായെന്നാണ് വിവരം. ബിജെപിയിൽ നിന്നുള്ള ദേവന്റെ രാജിക്ക് പിന്നാലെ വരുന്ന ഈ നീക്കം കേരള രാഷ്ട്രീയത്തിലും സിനിമാ–രാഷ്ട്രീയ ബന്ധങ്ങളിലും പുതിയ ചർച്ചകൾക്ക് വഴിതുറക്കുകയാണ്.