മഹാരാഷ്ട്ര കുടുംബദുരന്തത്തിൽ പുതിയ വഴിത്തിരിവ്

ഐഫോൺ തർക്കമല്ലേ കാരണം? മഹാരാഷ്ട്ര കുടുംബദുരന്തത്തിൽ പുതിയ വഴിത്തിരിവ്

മഹാരാഷ്ട്രയിലെ ഛത്രപതി സംഭാജിനഗറിൽ 18കാരൻ കുനാൽ ചന്ദ്ഗുഡെയും മാതാപിതാക്കളായ മുരളീധറും സംഗീതയും മലമുകളിൽ നിന്ന് വീണ് മരിച്ച സംഭവത്തിൽ പുതിയ വിവരങ്ങൾ. ആദ്യം ഐഫോൺ വാങ്ങിയതിന്റെ ഇഎംഐയെച്ചൊല്ലിയ തർക്കമാണ് ദുരന്തത്തിന് കാരണമെന്ന് റിപ്പോർട്ടുകളുണ്ടായിരുന്നു. എന്നാൽ കുടുംബാംഗങ്ങൾ ഈ വാദം തള്ളിക്കളഞ്ഞു. കുടുംബത്തിനുള്ളിലെ ദീർഘകാല പ്രശ്നങ്ങളും സ്വത്തുമായി ബന്ധപ്പെട്ട തർക്കങ്ങളും പൊലീസ് ഇപ്പോൾ പരിശോധിക്കുകയാണ്.

കുനാൽ 2025ലും ഇതേ മലയിൽ നിന്ന് ജീവനൊടുക്കാൻ ശ്രമിച്ചിരുന്നുവെന്നും അന്ന് പൊലീസ് ഇടപെട്ട് പിന്തിരിപ്പിച്ചിരുന്നുവെന്നും അന്വേഷണത്തിൽ വ്യക്തമായി. സംഭവദിവസം മണിക്കൂറുകളോളം കുനാലിനെ പിന്തിരിപ്പിക്കാൻ ശ്രമിച്ച പിതാവ് രക്ഷിക്കാനുള്ള ശ്രമത്തിനിടെ മകനൊപ്പം താഴേക്ക് വീണു; പിന്നാലെ അമ്മയും ജീവനൊടുക്കി. ‘ഐഫോൺ ദുരന്തം’ എന്ന ആദ്യനിഗമനത്തിനപ്പുറം കുടുംബത്തിലെ ആഴത്തിലുള്ള പ്രശ്നങ്ങളിലേക്കാണ് അന്വേഷണം ഇപ്പോൾ നീങ്ങുന്നത്.