അഞ്ച് മിനിറ്റിനുള്ളിൽ ഏകമകളെ നഷ്ടപ്പെട്ട് മാതാപിതാക്കൾ

അഞ്ച് മിനിറ്റിൽ നഷ്ടമായ ഏകമകൾ; ഷാർജയിൽ സഫയുടെ ദാരുണാന്ത്യം

ഷാർജയിലെ അൽ നബ്ബയിൽ മൂന്നാം നിലയിലെ അപ്പാർട്മെന്റിൽ നിന്ന് വീണ് ഏഴുവയസ്സുകാരിയായ മലയാളി ബാലിക സഫ മുബാറക് മരിച്ചു. പിതാവ് മുബാറക് പാർക്കിങ്ങിലെ കാർ മാറ്റിയിടാൻ താഴേക്കിറങ്ങിയ അഞ്ച് മിനിറ്റിനിടെയായിരുന്നു അപകടം. മാതാവ് മുർഷിദ ജോലിസ്ഥലത്തായിരുന്നു. ഉറക്കമുണർന്ന സഫ അച്ഛനെ തിരഞ്ഞ് സ്ലൈഡിങ് ജനൽ തുറന്ന് പുറത്തേക്ക് നോക്കുന്നതിനിടെ ബാലൻസ് തെറ്റി വീണതാകാമെന്നാണ് പ്രാഥമിക നിഗമനം.

അജ്മാനിലെ സ്വകാര്യ സ്കൂളിൽ രണ്ടാം ക്ലാസ് വിദ്യാർഥിനിയായ സഫ ദമ്പതികളുടെ ഏക മകളായിരുന്നു. ബന്ധുവിന്റെ വിവാഹത്തിൽ പങ്കെടുക്കാൻ നാട്ടിലെത്തിയ കുടുംബം കഴിഞ്ഞ ആഴ്ചയാണ് യുഎഇയിൽ തിരിച്ചെത്തിയത്. സംഭവത്തിൽ ഷാർജ പൊലീസ് അന്വേഷണം തുടരുന്നു; അപകടമെന്നാണ് പ്രാഥമിക വിലയിരുത്തൽ. മൃതദേഹം ഫൊറൻസിക് പരിശോധനയ്ക്കായി മാറ്റി.