മരട് അനീഷ് വീണ്ടും കാപ്പ ചുമത്തി അറസ്റ്റിൽ; കൊച്ചിയിലെ കുപ്രസിദ്ധ ഗുണ്ട ഒരു വർഷത്തേക്ക് കരുതൽ തടങ്കലിൽ !!

മരട് അനീഷ് വീണ്ടും അകത്ത്; ഇത്തവണ കാപ്പയുടെ പൂട്ടിൽ

കൊച്ചിയിലെ ഗുണ്ടാ ലോകത്ത് ഏറെക്കാലമായി പരിചിതമായ പേരായ മരട് അനീഷ് വീണ്ടും അറസ്റ്റിൽ. കേരളത്തിലും തമിഴ്നാട്ടിലുമായി അമ്പതോളം ക്രിമിനൽ കേസുകളിൽ പ്രതിയായ അനീഷിനെതിരെ കാപ്പ ചുമത്തി ഒരു വർഷത്തെ കരുതൽ തടങ്കലിലാക്കിയാണ് പൊലീസ് നടപടി. അറസ്റ്റിന് പിന്നാലെ ഇയാളെ വിയ്യൂർ സെൻട്രൽ ജയിലിലേക്ക് മാറ്റി.

കഴിഞ്ഞ ജൂലൈയിൽ നെടുമ്പാശ്ശേരിയിലെ ഒരു സ്പായിൽ അതിക്രമിച്ചു കയറി പണപ്പിരിവിന് ശ്രമിക്കുകയും ജീവനക്കാരെ ഭീഷണിപ്പെടുത്തുകയും സ്ത്രീകൾക്ക് നേരെ അതിക്രമം കാണിക്കുകയും ചെയ്തെന്ന പരാതിയിലും അനീഷിനെതിരെ കേസെടുത്തിരുന്നു.

അറസ്റ്റും ജയിലും ജാമ്യവും വീണ്ടും കേസും — വർഷങ്ങളായി ആവർത്തിച്ചുകൊണ്ടിരുന്ന ആ ചക്രത്തിന് ഇത്തവണ പൊലീസ് നൽകിയിരിക്കുന്നത് ഒരു വർഷത്തെ കാപ്പാ ബ്രേക്ക്. ഇനി വിയ്യൂരിലെ മതിലുകൾക്കുള്ളിൽ മരട് അനീഷിന്റെ അടുത്ത അധ്യായം.