48 മണിക്കൂറിനുള്ളിൽ 50 ലക്ഷം റിക്വസ്റ്റുകൾ; കൈക്കൂലി അനുഭവങ്ങൾ പങ്കുവെക്കാൻ തുടങ്ങിയ 'Bribes.fyi' വെബ്സൈറ്റ് പ്രവർത്തനം നിർത്തി

48 മണിക്കൂറിൽ 50 ലക്ഷം റിക്വസ്റ്റുകൾ; ‘Bribes.fyi’ പൂട്ടി

ഇന്ത്യയിലെ കൈക്കൂലി അനുഭവങ്ങൾ അനാമികമായി രേഖപ്പെടുത്താൻ തുടങ്ങിയ Bribes.fyi എന്ന ക്രൗഡ്‌സോഴ്‌സ്ഡ് വെബ്‌സൈറ്റ് അനിശ്ചിതകാലത്തേക്ക് പ്രവർത്തനം നിർത്തി. ഡൽഹിയിലെ മഹാരാജ അഗ്രസേൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ബി.ടെക് വിദ്യാർഥി ആര്യൻ നിഷാദ് ആരംഭിച്ച പ്ലാറ്റ്ഫോം അതിവേഗം വൈറലായി. വെറും 48 മണിക്കൂറിനിടെ 50 ലക്ഷത്തിലധികം റിക്വസ്റ്റുകളും ഏകദേശം രണ്ട് ലക്ഷം പുതിയ ഉപയോക്താക്കളും എത്തിയതായി ടീം അറിയിച്ചു.

പൊലീസ്, ആർടിഒ, റവന്യൂ, പാസ്‌പോർട്ട് ഓഫീസ് തുടങ്ങിയ മേഖലകളിലെ കൈക്കൂലി അനുഭവങ്ങൾ പേരറിയിക്കാതെ പങ്കുവയ്ക്കാനായിരുന്നു സൗകര്യം. എന്നാൽ ഡാറ്റാ സുരക്ഷ, നിയമപരമായ ബാധ്യത, ദുരുപയോഗ സാധ്യത എന്നിവ കണക്കിലെടുത്ത് സൈറ്റ് സ്വമേധയാ അവസാനിപ്പിക്കുകയാണെന്ന് ടീം വ്യക്തമാക്കി. ഔദ്യോഗിക പരാതിയെ തുടർന്നല്ല തീരുമാനം എന്നും ശേഖരിച്ച ഡാറ്റ സ്ഥിരമായി ഇല്ലാതാക്കുമെന്നും അറിയിച്ചു.