നവ്ദീപ് സൂരിക്ക് പഞ്ചാബിൽ വോട്ടർപട്ടികയിൽ തിരിച്ചടി

മൂന്ന് രാജ്യങ്ങളിൽ ഇന്ത്യയുടെ അംബാസഡർ; ഇനി സ്വന്തം പൗരത്വം തെളിയിക്കണം!

ഇന്ത്യയെ മൂന്ന് രാജ്യങ്ങളിൽ പ്രതിനിധീകരിച്ച മുൻ നയതന്ത്രജ്ഞൻ നവ്ദീപ് സൂരിക്ക് പഞ്ചാബിലെ വോട്ടർപട്ടികയുടെ Special Intensive Revision (SIR) നടപടിക്കിടെ അധിക രേഖകൾ ഹാജരാക്കാൻ നിർദേശം. വോട്ടർ ഐഡിയും ആധാറും നൽകിയിട്ടും 2003ലെ വോട്ടർപട്ടികയുമായി വിവരങ്ങൾ പൊരുത്തപ്പെടുന്നില്ലെന്ന് അറിയിച്ചതായി സൂരി വ്യക്തമാക്കി. തുടർന്ന് ഇന്ത്യൻ പൗരനാണെന്ന് തെളിയിക്കുന്ന രേഖകളുമായി വീണ്ടും ഹാജരാകാൻ നോട്ടീസ് ലഭിച്ചെന്നും അദ്ദേഹം പറഞ്ഞു.

യുഎഇയിലും ഈജിപ്തിലും ഇന്ത്യയുടെ അംബാസഡറായും ഓസ്ട്രേലിയയിൽ ഹൈക്കമ്മിഷണറായും സേവനമനുഷ്ഠിച്ച വ്യക്തിക്കുപോലും ഇത്തരമൊരു സാഹചര്യമുണ്ടെങ്കിൽ സാധാരണക്കാരുടെ അവസ്ഥ എന്താകുമെന്നാണ് സൂരിയുടെ ചോദ്യം. 2003ൽ വിദേശസേവനത്തിലായിരുന്നതിനാലാണ് പഴയ പട്ടികയുമായി പേര് മാപ്പ് ചെയ്യപ്പെടാതിരുന്നതെന്ന് തിരഞ്ഞെടുപ്പ് അധികൃതർ വിശദീകരിച്ചു. SIR നടപടിക്രമം ഇതോടെ വീണ്ടും ചർച്ചയാകുകയാണ്.