നിർണായക ദൃക്സാക്ഷി മൊഴി

അഞ്ജനയെ ഇടിച്ചിട്ട ശേഷം രക്ഷപ്പെടാൻ ശ്രമം; അനിലയെ പിന്തുടർന്ന് പൊലീസിനെ അറിയിച്ച് ദൃക്സാക്ഷി

കാലിഫോർണിയയിലെ മലയാളി യുവതികളുടെ ഇരട്ടക്കൊലക്കേസിൽ നിർണായക ദൃക്സാക്ഷി മൊഴി പുറത്തുവന്നു. അഞ്ജന ഹരിയെ എസ്‌യുവി ഇടിച്ച ശേഷം അനില ബേബി സ്ഥലത്തുനിന്ന് വാഹനം ഓടിച്ചുപോയെന്നും, ഇത് കണ്ട ഒരാൾ വാഹനം പിന്തുടർന്ന് പൊലീസിനെ വിവരം അറിയിച്ചെന്നുംകേരളകൗമുദി റിപ്പോർട്ട് ചെയ്യുന്നു.

അഞ്ജന ബാഗുമായി കാറിനടുത്തേക്ക് വരുന്നത് കണ്ടതായും, വാഹനം പെട്ടെന്ന് മുന്നോട്ടെടുത്ത് ഇടിച്ചതായുമാണ് മറ്റൊരു ദൃക്സാക്ഷിയുടെ മൊഴി. സംഭവസ്ഥലത്തെ ടയർ പാടുകൾ പരിശോധിച്ച പൊലീസ്, ഇടിക്കുന്നതിന് മുമ്പ് ബ്രേക്ക് ചെയ്തതിന്റെ അടയാളങ്ങളില്ലെന്ന് കണ്ടെത്തിയതായും റിപ്പോർട്ടുണ്ട്. ഇതിന്റെ അടിസ്ഥാനത്തിലാണ് സംഭവം മനഃപൂർവമായിരുന്നുവെന്ന നിഗമനത്തിലേക്ക് പൊലീസ് എത്തിയതെന്ന് റിപ്പോർട്ടുകൾ പറയുന്നു.

അതേസമയം ആൻ മേരി മാത്യുവിന്റെ മരണവുമായി ബന്ധപ്പെട്ട മുഴുവൻ സാഹചര്യങ്ങളും കൊലപാതകങ്ങളുടെ കാരണവും ഇപ്പോഴും അന്വേഷണത്തിലാണ്. അതിനാൽ പുറത്തുവരുന്ന ഓരോ പുതിയ വിവരവും കേസിന്റെ ദുരൂഹത നീക്കുന്നതിൽ നിർണായകമാകുകയാണ്.