കേരളത്തിന് സീപ്ലെയ്ൻ ചിറകുകൾ; ശബരിമല വിമാനത്താവളത്തിനും കേന്ദ്രത്തിന്റെ പിന്തുണ: കേന്ദ്രമന്ത്രി കെ. റാം മോഹൻ നായിഡു

കേരളത്തിന് സീപ്ലെയ്ൻ ചിറകുകൾ; ശബരിമല വിമാനത്താവളത്തിനും കേന്ദ്രത്തിന്റെ പിന്തുണ

കേരളത്തിന്റെ വ്യോമയാന മേഖലയിൽ പുതിയ മുന്നേറ്റങ്ങൾക്ക് കേന്ദ്ര സർക്കാരിന്റെ പിന്തുണ. കൊച്ചി–ലക്ഷദ്വീപ് സീപ്ലെയ്ൻ സർവീസ് ഉടൻ ആരംഭിക്കുമെന്ന് കേന്ദ്ര സിവിൽ ഏവിയേഷൻ മന്ത്രി കെ. റാം മോഹൻ നായിഡു വ്യക്തമാക്കി. കേരളത്തിലെ വിമാനയാത്രാ പ്രശ്നങ്ങൾ പരിഹരിക്കാൻ സാധ്യമായ എല്ലാ നടപടികളും സ്വീകരിക്കുമെന്നും അദ്ദേഹം പറഞ്ഞു.

നിർദിഷ്ട ശബരിമല വിമാനത്താവള പദ്ധതി യാഥാർഥ്യമാക്കുന്നതിനും കേന്ദ്രം ആവശ്യമായ സഹായം നൽകുമെന്ന് മന്ത്രി ഉറപ്പുനൽകി. അദ്ദേഹം. രാജ്യത്തെ വിമാനത്താവളങ്ങളുടെ നവീകരണത്തിനായി ₹28,840 കോടി ചെലവഴിക്കുമെന്നും ഇതിലൂടെ വലിയ തോതിൽ തൊഴിലവസരങ്ങൾ സൃഷ്ടിക്കപ്പെടുമെന്നും മന്ത്രി വ്യക്തമാക്കി.

‘മേക്ക് ഇൻ ഇന്ത്യ’ പദ്ധതിയുടെ ഭാഗമായി രാജ്യത്തെ ആദ്യ തദ്ദേശീയ യാത്രാവിമാനം അടുത്ത രണ്ടു വർഷത്തിനുള്ളിൽ നിർമിക്കാനുള്ള ലക്ഷ്യവും കേന്ദ്രത്തിനുണ്ടെന്ന് മന്ത്രി അറിയിച്ചു. കേരളത്തിന്റെ വിനോദസഞ്ചാരത്തിനും വ്യോമയാന ബന്ധത്തിനും പുതിയ സാധ്യതകൾ തുറക്കുന്ന പ്രഖ്യാപനങ്ങളായാണ് ഇവ വിലയിരുത്തപ്പെടുന്നത്.