കേരളത്തിലെ നിയമസഭാ തെരഞ്ഞെടുപ്പ് അടുത്തെത്തുമ്പോൾ സർക്കാർ പ്രചാരണങ്ങൾക്ക് അനുവദിച്ചിരിക്കുന്ന വൻതുക വീണ്ടും രാഷ്ട്രീയ ചർച്ചകൾക്ക് വഴിവച്ചിരിക്കുകയാണ്. നടപ്പു സാമ്പത്തിക വർഷത്തിലെ ബജറ്റിൽ പൊതുജന വിവര വകുപ്പായ പിആർഡിക്ക് അനുവദിച്ച 80 കോടി രൂപയ്ക്ക് പുറമെ, പ്രത്യേക പ്രചാരണത്തിനായി 22.24 കോടി രൂപ കൂടി അനുവദിച്ചതാണ് ഇപ്പോൾ വിവാദമായിരിക്കുന്നത്. സർക്കാർ ക്ഷേമപദ്ധതികളുടെ വിവരങ്ങൾ ജനങ്ങളിലേക്ക് എത്തിക്കാനാണെന്നാണ് ഉത്തരവിൽ വ്യക്തമാക്കുന്നത്.
2026 ജനുവരി 8 മുതൽ തെരഞ്ഞെടുപ്പ് പെരുമാറ്റച്ചട്ടം നിലവിൽ വരുന്നതുവരെ ഈ പ്രചാരണം നടത്താനാണ് പദ്ധതി. എന്നാൽ വിമർശകർ ചോദിക്കുന്നത് മറ്റൊന്നാണ് — ജനങ്ങളുടെ നികുതിപണം ഉപയോഗിച്ച് സർക്കാർ പ്രചാരണം നടത്തുന്നത് യഥാർത്ഥത്തിൽ ജനബോധവൽക്കരണമാണോ, അതോ തിരഞ്ഞെടുപ്പ് മുന്നൊരുക്കമാണോ എന്നതാണ്.
ഈ പ്രത്യേക പ്രചാരണത്തിന് അനുവദിച്ച തുക വിവിധ തലക്കെട്ടുകളിലായാണ് വിനിയോഗിക്കാൻ തീരുമാനിച്ചിരിക്കുന്നത്. ഔട്ട്ഡോർ പരസ്യങ്ങൾക്ക് മാത്രം 14.54 കോടി രൂപ അനുവദിച്ചിരിക്കുന്നു. കൂടാതെ ഡോക്യുമെന്ററി നിർമ്മാണത്തിന് 5 കോടി രൂപയും സർക്കാർ വെബ്സൈറ്റിന്റെ രൂപീകരണത്തിനും തപാൽ സെർവർ പരിപാലനത്തിനുമായി 2.70 കോടി രൂപയും അനുവദിച്ചിട്ടുണ്ട്.
മിക്ക പരസ്യങ്ങൾക്കും ഏകദേശം 60 ദിവസമാണ് കാലാവധി നിശ്ചയിച്ചിരിക്കുന്നത്. അതായത് തെരഞ്ഞെടുപ്പ് പ്രഖ്യാപനത്തിന് തൊട്ടുമുമ്പുള്ള കാലഘട്ടത്തിൽ തന്നെ ഈ പരസ്യപ്രചാരണങ്ങൾ വ്യാപകമായി പ്രത്യക്ഷപ്പെടും.
പരസ്യങ്ങളിൽ മുഖ്യമന്ത്രിയുടെ മുഖമാണ് പ്രധാന ആകർഷണമെന്നതും ശ്രദ്ധേയമാണ്. സംസ്ഥാനമൊട്ടാകെ സ്ഥാപിക്കുന്ന 600 വലിയ ഹോർഡിംഗുകൾക്കായി മാത്രം 10 കോടി രൂപ മാറ്റിവെച്ചിട്ടുണ്ട്. കൂടാതെ കെഎസ്ആർടിസിയുടെ 2500 ഓർഡിനറി ബസുകളിലും 1000 ദീർഘദൂര ബസുകളിലും ബ്രാൻഡിംഗ് നടത്തുന്നതിനായി 2 കോടി രൂപ അനുവദിച്ചിട്ടുണ്ട്.
ഇതിലൂടെ കേരളത്തിലെ റോഡുകളിൽ സഞ്ചരിക്കുന്ന ഓരോ വാഹനവും ഒരു പ്രചാരണ വേദിയായി മാറുമെന്നാണ് വിലയിരുത്തൽ.
റെയിൽവേയും മെട്രോയുമെല്ലാം ഈ പ്രചാരണ പദ്ധതിയിൽ ഉൾപ്പെടുത്തിയിട്ടുണ്ട്. ഗുരുവായൂർ ഇന്റർസിറ്റി, പരശുരാം, ഏറനാട് എന്നീ ട്രെയിനുകളിൽ 150 പരസ്യ ബോർഡുകൾ സ്ഥാപിക്കാൻ 10 ലക്ഷം രൂപ അനുവദിച്ചിട്ടുണ്ട്. മെട്രോ പില്ലറുകളിൽ 75 ബോക്സ് പരസ്യങ്ങൾക്ക് 35 ലക്ഷം രൂപയും അഞ്ച് ട്രെയിനുകളിലെ അഞ്ച് കോച്ചുകൾ റാപ്പിംഗ് ചെയ്യുന്നതിനായി 60 ലക്ഷം രൂപയും അനുവദിച്ചു.
കൂടാതെ 16 റെയിൽവേ സ്റ്റേഷനുകളിൽ 102 എൽഇഡി സ്ക്രീനുകളും വിവിധ സ്റ്റേഷനുകളിലും ബസ് സ്റ്റേഷനുകളിലും ജിംഗിളുകളും സ്ഥാപിക്കാനായി പ്രത്യേക തുകയും അനുവദിച്ചിട്ടുണ്ട്.
സോഷ്യൽ മീഡിയയും പ്രചാരണത്തിന്റെ പ്രധാന ഘടകമാണ്. ജില്ലാതല സോഷ്യൽ മീഡിയ പ്രചാരണങ്ങൾക്ക് 70 ലക്ഷം രൂപയും പ്രത്യേക സോഷ്യൽ മീഡിയ മെറ്റീരിയലുകൾ നിർമ്മിക്കാൻ 2 കോടി രൂപയും അനുവദിച്ചിട്ടുണ്ട്. കൂടാതെ പരസ്യ നിർമ്മാണത്തിനായി മാത്രം 5.40 കോടി രൂപ മാറ്റിവെച്ചിട്ടുണ്ട്.
ഇങ്ങനെ വിവിധ വകുപ്പുകളിലായി കണക്കാക്കുമ്പോൾ ഏകദേശം 100 കോടി രൂപയോളം ജനങ്ങളുടെ പണം പരസ്യപ്രചാരണത്തിന് വിനിയോഗിക്കപ്പെടുന്നുവെന്നാണ് വിമർശകർ ചൂണ്ടിക്കാണിക്കുന്നത്.
ഇതെല്ലാം ചേർന്നപ്പോൾ രാഷ്ട്രീയ വിമർശനം ശക്തമാകുന്നത് സ്വാഭാവികമാണ്. ക്ഷേമപദ്ധതികളുടെ വിവരങ്ങൾ ജനങ്ങളിലേക്ക് എത്തിക്കുന്നത് സർക്കാരിന്റെ കടമയാണെങ്കിലും, തെരഞ്ഞെടുപ്പ് അടുത്തിരിക്കുന്ന സമയത്ത് വൻതുകയുള്ള പരസ്യപ്രചാരണം നടത്തുന്നത് ശരിയാണോ എന്ന ചോദ്യം ഉയരുന്നു.
ജനങ്ങളുടെ നികുതിപണം ഉപയോഗിച്ച് നടക്കുന്ന ഈ പ്രചാരണം യഥാർത്ഥത്തിൽ ഭരണപരമായ ഉത്തരവാദിത്തമാണോ, അതോ രാഷ്ട്രീയ നേട്ടം ലക്ഷ്യമിട്ടുള്ള നീക്കമാണോ എന്നത് ഇനി ജനങ്ങളാണ് വിലയിരുത്തേണ്ടത്.
വേതാളത്തെ തോളിലേറ്റിക്കൊണ്ട് വിക്രമാദിത്യൻ :
