സൗന്ദര്യവും അച്ചടക്കവും കുടുംബഭദ്രതയും:

മമ്മൂട്ടി എന്ന മഹാനടന്റെയും കുടുംബത്തിന്റെയും ജീവിതപാഠങ്ങൾ

മലയാള ചലച്ചിത്ര രംഗത്ത് അഞ്ച് പതിറ്റാണ്ടുകളിലധികമായി സമാനതകളില്ലാത്ത നായകപദവി നിലനിർത്തുന്ന പ്രതിഭയാണ് മമ്മൂട്ടി. കേവലം അഭിനയപാടവം കൊണ്ടല്ല, മറിച്ച് കണിശമായ ജീവിതചര്യകളും വിട്ടുവീഴ്ചയില്ലാത്ത അച്ചടക്കവും കൊണ്ടാണ് അദ്ദേഹം തന്റെ കരിയറിലെ ഔന്നത്യങ്ങൾ കീഴടക്കിയത്.

ഒരു സാധാരണ മധ്യവർഗ്ഗ കുടുംബത്തിൽ ജനിച്ച മുഹമ്മദ് കുട്ടി എന്ന യുവാവ് ഇന്ത്യൻ സിനിമയുടെ അഭിമാനമായി മാറിയ പ്രയാണത്തിന് പിന്നിൽ മാതൃകാപരമായ ഒരു കുടുംബപശ്ചാത്തലമുണ്ട്. അദ്ദേഹത്തിന്റെ അച്ചടക്കത്തിന്റെ അടിത്തറ പാകിയ ഉമ്മ ഫാത്തിമയും, അത് ജീവിതത്തിലുടനീളം കാത്തുസൂക്ഷിക്കാൻ തണലായി നിന്ന പ്രിയതമ സുൽഫത്തും ഈ ജീവിതവിജയത്തിലെ അവിഭാജ്യ ഘടകങ്ങളാണ്. 

ചെറുപ്പത്തിന്റെ രഹസ്യവും തുല്യതയോടെ നിൽക്കുന്ന പ്രിയതമയും

മമ്മൂട്ടിക്ക് പ്രായമേറുമ്പോഴും തന്റെ ചെറുപ്പവും പ്രസരിപ്പും അതേപടി നിലനിർത്താൻ സാധിക്കുന്നത് അദ്ദേഹത്തിന്റെ ഭക്ഷണക്രമവും വ്യായാമമുറകളും പാലിക്കുന്ന കണിശത കൊണ്ടാണ്. എന്നാൽ ഈ ചെറുപ്പത്തിന്റെ കാര്യത്തിൽ അദ്ദേഹത്തോട് ഒപ്പത്തിനൊപ്പം അല്ലെങ്കിൽ "കട്ടക്ക് നിൽക്കുന്ന" പ്രൗഢിയും സൗന്ദര്യവുമാണ് ഭാര്യ സുൽഫത്ത് കുറ്റിക്കുമുള്ളത്.

പൊതുവേദികളിലും ചലച്ചിത്ര സൽക്കാരങ്ങളിലും ഇരുവരും ഒരുമിച്ചെത്തുമ്പോൾ ആ കെട്ടുറപ്പുള്ള ദാമ്പത്യത്തിന്റെ ഭംഗി ആരാധകർ എടുത്തുപറയാറുണ്ട്. നാല് പതിറ്റാണ്ടിലധികമായി തുടരുന്ന ഇവരുടെ ദാമ്പത്യം സിനിമാ ലോകത്തെ ഏറ്റവും മാതൃകാപരമായ ഒന്നായി കണക്കാക്കപ്പെടുന്നു. 

തങ്ങളുടെ മാതാപിതാക്കൾ പരസ്പരം കാത്തുസൂക്ഷിക്കുന്ന ആഴമേറിയ സ്നേഹത്തെക്കുറിച്ച് മകൻ ദുൽഖർ സൽമാൻ പലപ്പോഴും വാചാലനായിട്ടുണ്ട്. ചിത്രീകരണ തിരക്കുകളിലായിരിക്കുമ്പോൾ പോലും ഓരോ ഇടവേളയിലും മമ്മൂട്ടി ഭാര്യയെ വിളിക്കാറുണ്ടെന്ന് അദ്ദേഹം സാക്ഷ്യപ്പെടുത്തുന്നു. 

അച്ചടക്കത്തിന്റെ മാതൃവേരുകൾ: ഫാത്തിമ ഇസ്മായിൽ നൽകിയ ശിക്ഷണം

മമ്മൂട്ടിയുടെ ജീവിതത്തിലെയും സ്വഭാവരൂപീകരണത്തിലെയും ഏറ്റവും വലിയ സ്വാധീനശക്തി അദ്ദേഹത്തിന്റെ ഉമ്മ ഫാത്തിമ ഇസ്മായിൽ ആയിരുന്നു. വിവാഹം കഴിഞ്ഞ് നീണ്ട അഞ്ച് വർഷത്തെ കാത്തിരിപ്പിനൊടുവിലാണ് മൂത്ത മകനായി മമ്മൂട്ടി ജനിക്കുന്നത്. ഏറെ കൊതിച്ചുണ്ടായ മകനായതിനാൽ കുടുംബത്തിൽ എല്ലാവരും അദ്ദേഹത്തെ അതീവ വാത്സല്യത്തോടെയാണ് വളർത്തിയത്. എന്നാൽ ഈ സ്നേഹപ്രകടനങ്ങൾക്കിടയിലും കണിശമായ അച്ചടക്കം പഠിപ്പിക്കാൻ ആ ഉമ്മ എപ്പോഴും ജാഗ്രത പുലർത്തിയിരുന്നു. 

ചെറുപ്പത്തിൽ ഒരു സ്ഥലത്തും അടങ്ങിയിരിക്കാത്ത സ്വഭാവക്കാരനായിരുന്ന മമ്മൂട്ടി, പതിനാലാം വയസ്സിൽ വീട്ടുകാരറിയാതെ ഒറ്റയ്ക്ക് വള്ളം തുഴഞ്ഞ് പൂച്ചാക്കൽ വരെ പോയ സംഭവം ഉമ്മ ഓർത്തെഴുതിയിട്ടുണ്ട്. അപകടകരമായ ഈ സാഹസികത കഴിഞ്ഞ് തിരിച്ചെത്തിയ മകന് ഉമ്മ നൽകിയ കഠിനമായ ശിക്ഷ അച്ചടക്കത്തിന്റെയും ഉത്തരവാദിത്തത്തിന്റെയും ആദ്യ പാഠമായിരുന്നു.

മുഹമ്മദ് കുട്ടി എന്ന പേര് സിനിമയ്ക്കായി 'മമ്മൂട്ടി' എന്ന് മാറ്റിയപ്പോൾ ഉമ്മ ആദ്യം ശക്തമായി എതിർക്കുകയും വഴക്കുപറയുകയും ചെയ്തിരുന്നു; എന്നാൽ പിന്നീട് ആ പേര് ലോകം ഏറ്റെടുത്തപ്പോൾ അവർ ഏറെ സന്തോഷിച്ചു. മകൻ ലോകമറിയുന്ന സൂപ്പർസ്റ്റാർ ആയപ്പോഴും ഉമ്മയുടെ മനസ്സിൽ അവൻ എന്നും പ്രിയപ്പെട്ട "മമ്മൂഞ്ഞ്" മാത്രമായിരുന്നു. 

കാര്യദർശിയും തണലുമായി സുൽഫത്ത് എന്ന അഡ്മിനിസ്ട്രേറ്റർ

മമ്മൂട്ടി കുടുംബത്തിന്റെ യഥാർത്ഥ കാര്യദർശി അഥവാ 'അഡ്മിനിസ്ട്രേറ്റർ' സുൽഫത്താണ്. ഒരു വലിയ സിനിമയുടെ നിർവഹണം പോലെ കണിശതയോടെയാണ് സുൽഫത്ത് വീട്ടു കാര്യങ്ങൾ നോക്കിനടത്തുന്നത്. വീട്ടിലെ ജോലിക്കാരുടെയും ഡ്രൈവർമാരുടെയും മറ്റ് സഹായികളുടെയും എല്ലാ വ്യക്തിപരമായ ആവശ്യങ്ങളും ബുദ്ധിമുട്ടുകളും കണ്ടറിഞ്ഞ് സഹായിക്കുന്നത് സുൽഫത്തിന്റെ കാരുണ്യപ്രവർത്തനങ്ങളുടെ ഭാഗമാണ്. 

മമ്മൂട്ടിയുടെ വ്യക്തിഗത ഡ്രൈവറായ ഉണ്ണി കെ. വാസു അടക്കമുള്ള ജീവനക്കാരോട് ഒരു കുടുംബാംഗത്തെപ്പോലെയാണ് സുൽഫത്ത് പെരുമാറുന്നത്. മമ്മൂട്ടിക്ക് തന്റെ കൂടെയുള്ളവരിൽ ഏറ്റവും കൂടുതൽ ഇഷ്ടമുള്ളതും സ്നേഹിച്ചിരുന്നതും സ്വന്തം ഡ്രൈവറെയായിരുന്നു.

പതിറ്റാണ്ടുകളായി അദ്ദേഹത്തിന്റെ വിശ്വസ്ത സാരഥിയായ ഉണ്ണി കെ. വാസുവിനോടുള്ള മമ്മൂട്ടിയുടെ ആത്മബന്ധം ചലച്ചിത്ര ലോകത്ത് വളരെ പ്രശസ്തമാണ്. എത്ര കടുത്ത ഷൂട്ടിംഗ് തിരക്കുകളിലും ഉറക്കമൊഴിഞ്ഞുള്ള ദിവസങ്ങളിലും തന്റെ യാത്രകളുടെ പൂർണ്ണ ഉത്തരവാദിത്തം മമ്മൂട്ടി വിശ്വസ്തതയോടെ ഏൽപ്പിക്കുന്നത് തന്റെ പ്രിയപ്പെട്ട ഡ്രൈവറായ ഉണ്ണിയെയാണ്. 

വക്കീൽ ജോലിയിൽ നിന്ന് സിനിമയിലേക്ക് വരാൻ മമ്മൂട്ടി ആഗ്രഹിച്ചപ്പോൾ സുൽഫത്തിന് തുടക്കത്തിൽ ചില ആശങ്കകളുണ്ടായിരുന്നു. എങ്കിലും പിന്നീട് അദ്ദേഹത്തിന്റെ താല്പര്യങ്ങൾക്കൊപ്പം നിൽക്കുകയും കരിയറിലെ ഉയർച്ചതാഴ്ചകളിൽ ഏറ്റവും വലിയ പിന്തുണയായി മാറുകയും ചെയ്തു. 

"അവൾ വിവാഹം കഴിച്ചത് ഒരു സിനിമാനടനെയല്ല, ഒരു വക്കീലിനെയാണ്. വക്കീലാകുമ്പോൾ പകൽ ജോലി കഴിഞ്ഞ് രാത്രി വീട്ടിലുണ്ടാകും എന്ന പ്രതീക്ഷയോടെ ജീവിതത്തിലേക്ക് വന്നയാളാണ്, അത് നമ്മൾ അറിയണം. ഞാൻ കൂടെയില്ലാത്ത വിഷമം അവളറിയരുത്," എന്ന മമ്മൂട്ടിയുടെ വാക്കുകൾ സുൽഫത്തിനോടുള്ള അദ്ദേഹത്തിന്റെ പ്രതിബദ്ധത വ്യക്തമാക്കുന്നു. 

തിയേറ്റർ ചരിത്രവും ദുബായിലെ 'മമ്മൂട്ടി ഹിറ്റ് പരേഡും'

ഒരു വർഷത്തിൽ പുറത്തിറങ്ങിയ മമ്മൂട്ടിയുടെ എല്ലാ സിനിമകളും ഒന്നിനുപിറകെ ഒന്നായി സൂപ്പർ ഹിറ്റായ അത്യപൂർവ്വമായ ഒരു കാലഘട്ടം മലയാള ചലച്ചിത്ര ചരിത്രത്തിലുണ്ടായിട്ടുണ്ട്. അക്കാലത്ത് കൊച്ചിയിലെ പ്രശസ്തമായ 'കവിത' തിയേറ്ററിൽ ഒരു വർഷക്കാലം മുഴുവൻ മമ്മൂട്ടി ചിത്രങ്ങൾ മാത്രമാണ് തുടർച്ചയായി പ്രദർശിപ്പിച്ചത്. ഒരു നടന്റെ ചിത്രങ്ങൾ മാത്രം ഒരു തിയേറ്ററിൽ ഒരു വർഷം മുഴുവൻ കളിക്കുക എന്നത് സിനിമാ ചരിത്രത്തിൽ തന്നെ സമാനതകളില്ലാത്ത റെക്കോർഡാണ്. 

ഈ ഹിറ്റുകളുടെ ഗംഭീരമായ ആഘോഷം ദുബായിൽ വെച്ച് 'മമ്മൂട്ടി ഹിറ്റ് പരേഡ്' എന്ന പേരിൽ സംഘടിപ്പിക്കാൻ തീരുമാനിച്ചപ്പോൾ, മമ്മൂട്ടി തലശ്ശേരിയിലെ റബ്കോ ഫാക്ടറിയിൽ വെച്ച് 'ബൽറാം വേഴ്സസ് താരാദാസ്' എന്ന സിനിമയുടെ ചിത്രീകരണത്തിലായിരുന്നു . അക്കാലത്ത് കോഴിക്കോട് നിന്നും കൊച്ചിയിലെത്തി ദുബായിലേക്ക് ഒരു ഇന്ത്യൻ എയർലൈൻസ് വിമാനം സർവീസ് നടത്തിയിരുന്നു .

എന്നാൽ അവിടെ നിന്നും ദുബായിലേക്കുള്ള ഇന്ത്യൻ എയർലൈൻസ് വിമാനത്തിൽ യാത്ര ചെയ്യാൻ മമ്മൂട്ടി തയ്യാറായില്ല. "എനിക്ക് അതിൽ വിശ്വാസമില്ല, ഞാൻ വരില്ല" എന്ന് അദ്ദേഹം ഉറപ്പിച്ചു പറയുകയായിരുന്നു. തുടർന്ന് സ്വന്തം ചെലവിൽ ഒമാൻ എയറിന്റെ ടിക്കറ്റെടുത്ത് മസ്കറ്റ് വഴിയാണ് അദ്ദേഹം ദുബായിലേക്ക് പുറപ്പെട്ടത്. അദ്ഭുതകരമെന്നു പറയട്ടെ, ആ ദിവസങ്ങളിൽ ഇന്ത്യൻ എയർലൈൻസിന്റെ വിമാനം സാങ്കേതിക തകരാറുകൾ മൂലം റദ്ദാക്കപ്പെട്ടിരുന്നു! മമ്മൂട്ടിയുടെ ആ കണിശമായ തീരുമാനമായിരുന്നു അന്നും ശരിയെന്ന് തെളിഞ്ഞത്.

ഈ ഹിറ്റ് പരേഡ് ദുബായിയുടെ ചരിത്രത്തിലെ തന്നെ ഏറ്റവും വലിയ റോഡ് ഷോയും സിനിമാ പ്രദർശനവുമായി മാറി. ദുബായ് വേൾഡ് ട്രേഡ് സെന്റർ ഹെലിപാഡിൽ നിന്ന് ഹെലികോപ്റ്ററിൽ പറന്നുയർന്ന മമ്മൂട്ടി മംസാർ പാർക്ക് ആംഫിതിയേറ്ററിലാണ് ലാൻഡ് ചെയ്തത്. ഒരു ലക്ഷത്തോളം വരുന്ന ആരാധകരെ സാക്ഷിനിർത്തിയായിരുന്നു ഈ ചരിത്രപ്രസിദ്ധമായ ലാൻഡിങ്. 

തുടർന്ന് ദുബായ് പൊലീസിന്റെ അകമ്പടിയോടെ ആയിരത്തോളം ആഡംബര കാറുകളാണ് ഈ ഭീൻ റോഡ് ഷോയിൽ അണിനിരന്നത്. ദുബായ് സർക്കാരിന്റെ പ്രത്യേക പ്രോട്ടോക്കോൾ സംവിധാനത്തിന്റെ ഭാഗമായി, 22 ചുവപ്പ് ട്രാഫിക് സിഗ്നലുകൾ (റെഡ് സിഗ്നലുകൾ) കട്ട് ചെയ്തുകൊണ്ട് തടസ്സമില്ലാതെ കടന്നുപോകാൻ ഈ രാജകീയ വാഹനവ്യൂഹത്തിന് അനുമതി നൽകിയിരുന്നു.

അതിനുശേഷം ഗംഭീരമായ ഒരു സംഗീത വിരുന്നും ഇതിന്റെ ഭാഗമായി ഒരുക്കിയിരുന്നു. വയലിനിസ്റ്റ് ബാലഭാസ്കറിന്റെ ഗൾഫിലെ അരങ്ങേറ്റം കൂടിയായിരുന്നു ആ സംഗീതവിരുന്ന് . ലോക ചരിത്രത്തിൽ തന്നെ ഒരു ചലച്ചിത്ര നടന് ലഭിച്ച ഏറ്റവും വലിയ സ്വീകരണങ്ങളിലൊന്നായി മാറിയ ഈ ഹിറ്റ് പരേഡ് വിഭാവനം ചെയ്തത് പ്രശസ്ത ആർട്ട് യു.എ.ഇ. സ്ഥാപകനായ സത്താർ അൽ കരൻ ആയിരുന്നു. 

അത്രയും വലിയ ജനസഞ്ചയം അണിനിരന്ന ആ വേദിയിൽ വെച്ച് ആരാധകരോട് വികാരഭരിതനായി നന്ദി പറയുന്നതിനിടയിൽ മമ്മൂട്ടി പറഞ്ഞ ഒരു വാചകം ഇന്നും മലയാളികൾ ഓർക്കുന്നു: "ആഘോഷങ്ങളെ ഞാൻ എന്നും ഭയക്കുന്നു." ഇത്രയധികം ആളുകളുടെ സ്നേഹവും വലിയ ആഘോഷങ്ങളും കാണുമ്പോൾ ഉള്ളിൽ ജനിക്കുന്ന ഒരുതരം ഭയവും വിനയവുമാണ് അദ്ദേഹത്തിന്റെ ആ വാക്കുകളിൽ നിറഞ്ഞുനിന്നിരുന്നത്.

ലോകസിനിമയിലെ വിസ്മയ റെക്കോർഡ്: സി.ബി.ഐ. പരമ്പരയും സേതുരാമയ്യരും

ഇന്ത്യൻ ചലച്ചിത്ര ചരിത്രത്തിൽ മറ്റൊരു നടന്റെയോ സിനിമയുടെയോ പേരിലില്ലാത്ത അപൂർവ്വവും വിസ്മയകരവുമായ ഒരു ലോക റെക്കോർഡ് മമ്മൂട്ടിയുടെ പേരിലുണ്ട്. അതാണ് അദ്ദേഹത്തിന്റെ പ്രശസ്തമായ 'സി.ബി.ഐ.' ഇൻവെസ്റ്റിഗേഷൻ സിനിമാ പരമ്പര.

ഒരേ കഥാപാത്രമായി ഒരേ നടൻ (മമ്മൂട്ടി), ഒരേ സംവിധായകൻ (കെ. മധു), ഒരേ തിരക്കഥാകൃത്ത് (എസ്. എൻ. സ്വാമി) എന്നിവർ ഒത്തുചേർന്ന് അഞ്ച് ചിത്രങ്ങൾ പൂർത്തിയാക്കിയ റെക്കോർഡാണിത്. ലോകസിനിമയിൽ തന്നെ ഒരേ നടനും ഇതേ അണിയറപ്രവർത്തകരും ചേർന്ന് ഇത്രയും വലിയൊരു ഫ്രാഞ്ചൈസി പൂർത്തിയാക്കുന്നത് ചരിത്രത്തിൽ ആദ്യമായാണ്. 

1988-ൽ പുറത്തിറങ്ങിയ 'ഒരു സി.ബി.ഐ. ഡയറിക്കുറിപ്പ്' എന്ന ചിത്രത്തിലൂടെയാണ് ഈ ചരിത്ര പ്രയാണം ആരംഭിക്കുന്നത്. തുടർന്ന് ജാഗ്രത (1989), സേതുരാമയ്യർ സി.ബി.ഐ. (2004), നേരറിയാൻ സി.ബി.ഐ. (2005), സി.ബി.ഐ. 5: ദി ബ്രെയിൻ (2022) എന്നീ അഞ്ച് സൂപ്പർ ഹിറ്റ് ചിത്രങ്ങളാണ് ഈ വമ്പൻ കൂട്ടുകെട്ടിൽ പിറന്നത്.

കൈകൾ പിന്നിൽ കെട്ടി, ശാന്തമായി തലച്ചോറുപയോഗിച്ച് കേസന്വേഷിക്കുന്ന കണിശക്കാരനായ സേതുരാമയ്യർ എന്ന തമിഴ് ബ്രാഹ്മണ കഥാപാത്രം മമ്മൂട്ടിയുടെ കരിയറിലെ ഏറ്റവും ജനപ്രിയമായ വേഷങ്ങളിലൊന്നാണ്. 35 വർഷത്തോളം നീണ്ടുനിന്ന ഈ സിനിമാ സൗഹൃദവും ഒരേ പരമ്പരയിലെ തുടർച്ചയും ഇന്ത്യൻ സിനിമ ലോകത്തെ വലിയൊരു വിസ്മയം തന്നെയാണ്. 

സിനിമയോടുള്ള സമർപ്പണവും 'ക്രോണിക് ബാച്ചിലർ' അനുഭവവും

സിനിമയോട് മമ്മൂട്ടി എന്ന നടനുള്ള ആത്മാർത്ഥതയും പ്രതിബദ്ധതയും വ്യക്തമാക്കുന്ന അനവധി അനുഭവങ്ങളുണ്ട്. അതിലൊന്നാണ് പ്രശസ്ത ചിത്രമായ 'ക്രോണിക് ബാച്ചിലർ' സിനിമയുടെ ചിത്രീകരണ സമയത്തുണ്ടായ സംഭവം. സിനിമയുടെ അവസാന ഭാഗങ്ങൾ പൂർത്തിയാക്കുന്നതിന് തൊട്ടുമുൻപ് മമ്മൂട്ടി ദുബായിൽ എത്തിയിരുന്നു. എന്നാൽ അദ്ദേഹത്തിന്റെ വിസ സ്റ്റാമ്പ് ചെയ്യാൻ നൽകിയ പാസ്‌പോർട്ട് തിരികെ ലഭിക്കാൻ വൈകുകയും ഓഫീസ് സമയം കഴിയുകയും ചെയ്തു.

പറഞ്ഞ സമയത്ത് സിനിമ പൂർത്തിയാക്കാൻ കഴിഞ്ഞില്ലെങ്കിൽ അത് ചിത്രീകരണത്തെയും അണിയറ പ്രവർത്തകരെയും ബാധിക്കുമെന്ന ആശങ്കയിൽ മമ്മൂട്ടി തന്റെ ഹോട്ടൽ മുറിയിലിരുന്ന് കണ്ണീർ വാർത്തത് അദ്ദേഹത്തിന് സിനിമയോടുള്ള തീക്ഷ്ണമായ കടപ്പാടിന്റെ തെളിവാണ്.

ഒടുവിൽ ഒരു അവധി ദിവസമായിരുന്നിട്ടും, ദുബായ് ഹോൾഡിങ് എക്സിക്യൂട്ടീവ് ഡയറക്ടറായിരുന്ന കൊടുങ്ങല്ലൂർ സ്വദേശി ഷരീഫ് ഇടപെട്ടാണ് പ്രത്യേകമായി അദ്ദേഹത്തിന്റെ പാസ്‌പോർട്ട്, ജബൽ അലി ഫ്രീസോണിലെഓഫീസിൽ നിന്ന് എടുത്തുനൽകിയത്. ആ സഹായം കൊണ്ടാണ് ക്രോണിക് ബാച്ചിലർ പറഞ്ഞ സമയത്ത് തന്നെ പൂർത്തിയാക്കാൻ സാധിച്ചത്.

മലയാള സിനിമയിലെ കുസൃതിക്കാരനും നവാഗതരുടെ തണലും

ഗൗരവക്കാരനായ ഒരു വ്യക്തിത്വമായി പലരും മമ്മൂട്ടിയെ ദൂരത്തുനിന്ന് നോക്കിക്കാണാറുണ്ടെങ്കിലും, യഥാർത്ഥത്തിൽ മലയാള സിനിമയിലെ ഏറ്റവും മികച്ച തമാശക്കാരൻ മമ്മൂട്ടിയാണ്. മലയാള വാക്കുകൾ കൊണ്ടുള്ള അദ്ദേഹത്തിന്റെ തമാശകളും സൗഹൃദ സദസ്സുകളിലെ കുസൃതികളും വളരെ പ്രശസ്തമാണ്.

മലയാള സിനിമയിലേക്ക് ഏറ്റവും കൂടുതൽ നവാഗതരായ സംവിധായകർക്ക് കടന്നുവരാൻ അവസരമൊരുക്കിയതും മമ്മൂട്ടിയാണ്. അദ്ദേഹം വിശ്വസിച്ച് കൈപിടിച്ചുയർത്തിയ ഒട്ടുമിക്ക നവാഗത സംവിധായകരുടെയും ചിത്രങ്ങൾ മലയാള സിനിമയിലെ വലിയ ഹിറ്റുകളായി മാറുകയും ചെയ്തു.

കെയർ ആൻഡ് ഷെയറും മമ്മൂട്ടിയുടെ കാരുണ്യ സ്പർശവും

മമ്മൂട്ടി എന്ന വ്യക്തിയുടെ ഹൃദയനന്മയും സാമൂഹിക പ്രതിബദ്ധതയും അടയാളപ്പെടുത്തുന്നതാണ് അദ്ദേഹത്തിന്റെ നേതൃത്വത്തിൽ നടന്നുപോകുന്ന ഒട്ടനവധി ജീവനക്കാരുണ്യ പ്രവർത്തനങ്ങൾ. അതിൽ ഏറ്റവും പ്രധാനപ്പെട്ടതാണ് 'കെയർ ആൻഡ് ഷെയർ ഇന്റർനാഷണൽ ഫൗണ്ടേഷൻ'.

കുട്ടികളുടെ ഹൃദയ ശസ്ത്രക്രിയകൾക്ക് സഹായമേകുന്ന പ്രൊജക്ടുകൾ മുതൽ 'വിദ്യാമൃതം' വിദ്യാഭ്യാസ സഹായ പദ്ധതി, അശരണർക്ക് താങ്ങാകുന്ന 'ചലനം', കാഴ്ച പരിമിതിയുള്ളവർക്കായി 'വഴികാട്ടി', കേൾവി പരിമിതിയുള്ള കുട്ടികൾക്കായി 'കാതോട് കാതോരം' തുടങ്ങി പന്ത്രണ്ടോളം വ്യത്യസ്തമായ കർമ്മ പദ്ധതികൾ ഈ ഫൗണ്ടേഷന്റെ കീഴിൽ നടന്നു വരുന്നുണ്ട്. 

മമ്മൂട്ടിയുടെ ഈ വിപുലമായ ജീവകാരുണ്യ പ്രവർത്തനങ്ങൾക്ക് എപ്പോഴും പിന്നിൽ നിന്ന് താങ്ങായി പ്രവർത്തിക്കുകയും അദ്ദേഹത്തെ സജീവമായി സഹായിക്കുകയും ചെയ്യുന്നത് കെയർ ആൻഡ് ഷെയർ ഇന്റർനാഷണൽ ഫൗണ്ടേഷന്റെ ചുമതലയുള്ള റോബർട്ട് കുര്യാക്കോസ് (ജിൻസ് കുര്യാക്കോസ്) ആണ്.

മമ്മൂക്കയുടെ ഏറ്റവും അടുത്ത അനുയായിയും പി.ആർ.ഓ.യുമായ ജിൻസ് കുര്യാക്കോസ്, ഈ പദ്ധതികളുടെയെല്ലാം ഏകോപനത്തിലും അർഹരായ ആളുകളിലേക്ക് സഹായങ്ങൾ കൃത്യമായി എത്തിക്കുന്നതിലും മുൻപന്തിയിൽ തന്നെയുണ്ട്. 

മമ്മൂട്ടിക്ക് തന്റെ ജീവിതത്തിൽ ഏറ്റവും കൂടുതൽ വിശ്വാസമുള്ള വ്യക്തിയാണ് 1991 മുതൽ അദ്ദേഹത്തോടൊപ്പമുള്ള പേഴ്സണൽ അസിസ്റ്റന്റും മേക്കപ്പ്മാനും പിന്നീട് പ്രശസ്ത നിർമ്മാതാവുമായി മാറിയ എസ്. ജോർജ്ജ്. ഒരു ഗർഭപാത്രത്തിൽ ജനിച്ചില്ല എന്നേയുള്ളൂ എന്ന് സുഹൃത്തുക്കൾ വിശേഷിപ്പിക്കുന്ന ജോർജ്ജാണ് മമ്മൂട്ടിയുടെ വ്യക്തിപരമായ എല്ലാ കാര്യങ്ങളും വിശ്വസ്തതയോടെ നോക്കിനടത്തുന്നത്. മമ്മൂക്ക എവിടെ പോയാലും അദ്ദേഹത്തിന്റെ നിഴലായി ജോർജ്ജ് എപ്പോഴും ഒപ്പമുണ്ടാകും. 

പാലക്കാട് അട്ടപ്പാടിയിലെ ആനവായ് ഗവൺമെന്റ് എൽ.പി. സ്‌കൂളിലെ കാടിനുള്ളിൽ പാർക്കുന്ന കുട്ടികൾക്ക് ബസ് കാണാനും കൊച്ചി നഗരം കാണാനുമുള്ള ആഗ്രഹം മമ്മൂട്ടി നേരിട്ടറിഞ്ഞ് സാധിച്ചുകൊടുത്തത് വലിയ രീതിയിൽ വാർത്തയായിരുന്നു.

കുട്ടികളെ സ്വന്തം അതിഥികളായി കൊച്ചിയിൽ എത്തിച്ച് മെട്രോയിലും വിമാനത്താവളത്തിലും കൊണ്ടുപോയതും, ആലുവ രാജഗിരി ആശുപത്രിയിലെ അത്യാധുനിക റോബോട്ടിക് ശസ്ത്രക്രിയ വിഭാഗം കാണിച്ചുകൊടുത്തതും മമ്മൂട്ടിയുടെ വലിയ സ്നേഹത്തിന്റെ തെളിവാണ്.

ഇതിലേക്ക് അദ്ദേഹത്തിന്റെ സന്തതസഹചാരിയായ എസ്. ജോർജിനൊപ്പം ജിൻസ് കുര്യാക്കോസും നേരിട്ടെത്തിയാണ് മേൽനോട്ടം വഹിച്ചത്. ഇതിനുപുറമേ ഉരുൾപൊട്ടലിലും മറ്റ് പ്രകൃതി ദുരന്തങ്ങളിലും പരിക്കേൽക്കുന്നവർക്ക് വലിയ രീതിയിൽ കാരുണ്യ സ്പർശമായി മാറാൻ അദ്ദേഹത്തിന് കഴിഞ്ഞിട്ടുണ്ട്.

മറ്റാരും അറിയാതെ ഒട്ടനവധി പാവപ്പെട്ട കുടുംബങ്ങൾക്ക് വ്യക്തിപരമായും സാമ്പത്തികമായും അദ്ദേഹം ദിവസേന സഹായങ്ങൾ ചെയ്തുവരുന്നു. "താരമൂല്യമല്ല, സമൂഹത്തിന്റെ നന്മയാണ് നിങ്ങളുടെ ആത്യന്തിക ലക്ഷ്യം" എന്ന് തന്റെ ആരാധകരോടും ഫാൻസ് അസോസിയേഷൻ പ്രവർത്തകരോടും അദ്ദേഹം എപ്പോഴും ഉപദേശിക്കാറുണ്ട്. 

ജ്യേഷ്ഠന്റെ കരുതൽ: സഹോദരങ്ങൾക്ക് മമ്മൂട്ടി നൽകിയ സഹായങ്ങൾ

തന്റെ വിജയങ്ങൾ സ്വന്തം കുടുംബത്തിന്റെ കൂടെ വിജയമാക്കാൻ മമ്മൂട്ടി എപ്പോഴും ശ്രദ്ധിച്ചിരുന്നു. ഇസ്മായിൽ-ഫാത്തിമ ദമ്പതികളുടെ ആറ് മക്കളിൽ മൂത്തയാളാണ് മമ്മൂട്ടി. ജ്യേഷ്ഠൻ എന്ന നിലയിൽ തന്റെ സഹോദരങ്ങളായ ഇബ്രാഹിംകുട്ടി, സക്കറിയ, ആമീന, സൗദ, ഷഫീന എന്നിവർക്ക് ആവശ്യത്തിലധികം സഹായങ്ങളും പിന്തുണയും നൽകാൻ മമ്മൂട്ടി മടിച്ചിട്ടില്ല. 

ജ്യേഷ്ഠൻ എന്ന നിലയിൽ മമ്മൂട്ടി തന്റെ കുടുംബാംഗങ്ങൾക്ക് നൽകിയ കരുതൽ മാതൃകാപരമാണ്. അദ്ദേഹത്തിന്റെ പ്രിയപ്പെട്ട ഉമ്മ ഫാത്തിമ ഇസ്മായിൽ വാത്സല്യത്തിലൂടെയും കണിശമായ ശിക്ഷണത്തിലൂടെയും മമ്മൂട്ടിയുടെ ജീവിതത്തിൽ അച്ചടക്കത്തിന്റെ ശക്തമായ അടിത്തറയിട്ടു.

ഈ അച്ചടക്കത്തോടെയുള്ള ജീവിതയാത്രയിൽ മമ്മൂട്ടിക്ക് പൂർണ്ണ പിന്തുണയുമായി നിൽക്കുന്നത് ഭാര്യ സുൽഫത്ത് കുട്ടിയാണ്. കുടുംബത്തിന്റെ മുഴുവൻ കാര്യദർശിയായി പ്രവർത്തിക്കുന്ന സുൽഫത്ത്, വീട്ടിലെ ജീവനക്കാരുടെയും സഹായികളുടെയും ആവശ്യങ്ങളും ബുദ്ധിമുട്ടുകളും കണ്ടറിഞ്ഞ് സ്നേഹത്തോടെ പരിഹരിക്കുന്നു. 

സഹോദരനായ ഇബ്രാഹിംകുട്ടി ചലച്ചിത്ര-സീരിയൽ രംഗത്ത് സജീവമായതും മമ്മൂട്ടിയുടെ പിന്തുണയോടെയാണ്. കൂടാതെ അദ്ദേഹത്തിന്റെ സഹോദരപുത്രന്മാരായ മഖ്ബൂൽ സൽമാൻ, അഷ്കർ സൗദാൻ എന്നിവരും സിനിമയിലേക്ക് ചുവടുവെച്ചപ്പോൾ മമ്മൂട്ടിയുടെ വലിയ തണലുണ്ടായിരുന്നു. സിനിമയ്ക്ക് പുറത്തും മറ്റൊരു അനുജനായ സക്കറിയയുടെ ബിസിനസ്സ് സംരംഭങ്ങളിലും വ്യക്തിജീവിതത്തിലും ജ്യേഷ്ഠൻ എന്ന നിലയിൽ താങ്ങായി നിൽക്കുന്ന ഒരു യഥാർത്ഥ കുടുംബനാഥനാണ് അദ്ദേഹം. 

കൂടാതെ, എൺപതുകളിൽ തന്റെ അനുജന്മാർക്കായി കൊച്ചിയിൽ മമ്മൂട്ടി ആരംഭിച്ച ഒരു വലിയ ബിസിനസ്സ് സംരംഭമായിരുന്നു 'സുറുമി വീഡിയോസ്'. ഇന്ത്യയിലെ തന്നെ ആദ്യത്തെ 'വീഡിയോ മാഗസിൻ' എന്ന വിപ്ലവകരമായ ഖ്യാതിയോടെയാണ് ഇത് ആരംഭിച്ചതെങ്കിലും, ചില കെടുകാര്യസ്ഥതകൾ കാരണം ഈ സംരംഭം പിന്നീട് പരാജയപ്പെടുകയാണുണ്ടായത്. എങ്കിലും തന്റെ സഹോദരങ്ങൾക്ക് സ്വയം തൊഴിൽ കണ്ടെത്താനും അവരെ ബിസിനസ്സിൽ വളർത്താനും ഒരു ജ്യേഷ്ഠൻ എന്ന നിലയിൽ മമ്മൂട്ടി കാട്ടിയ വലിയ കരുതലിന്റെ അടയാളമായിരുന്നു അത്. 

ഇതിനുപുറമേ, തന്റെ സഹോദരങ്ങൾക്ക് വേണ്ടി മമ്മൂട്ടി മുൻകൈയെടുത്ത് നിർമ്മിച്ച് നൽകിയ ചിത്രമാണ് വലിയ രീതിയിൽ ചലച്ചിത്ര ബോക്‌സ് ഓഫീസിൽ തരംഗമായി മാറിയ 'മായാവി'. തന്റെ സഹോദരങ്ങളുടെ കരിയറിന് മികച്ചൊരു താങ്ങാവുക എന്ന ലക്ഷ്യത്തോടെയാണ് ഈ ആക്ഷൻ കോമഡി ചിത്രം അദ്ദേഹം ഒരുക്കി നൽകിയത്. കച്ചവടവിജയം കൈവരിച്ച ഈ ചിത്രത്തിലൂടെ സഹോദരങ്ങളോടുള്ള ഒരു ജ്യേഷ്ഠന്റെ സ്നേഹവും കരുതലും ഒരിക്കൽ കൂടി സുവ്യക്തമായി. 

ലവലേശം അഹങ്കാരമില്ലാത്ത വളർത്തലും അച്ചടക്കമുള്ള മക്കളും

ഇത്രയും വലിയ പാരമ്പര്യവും പ്രശസ്തിയുമുണ്ടായിട്ടും മമ്മൂട്ടി തന്റെ മക്കളായ സുറുമിയെയും ദുൽഖറിനെയും ലവലേശം അহങ്കാരമില്ലാതെയാണ് വളർത്തിയത്. പണക്കൊഴുപ്പിന്റെയോ സ്റ്റാർ പദവിയുടെയോ യാതൊരുവിധ തലക്കനവുമില്ലാതെ, സാധാരണക്കാരായി ജീവിക്കാൻ അദ്ദേഹം കുട്ടികളെ പഠിപ്പിച്ചു. 

കുട്ടികളെ എപ്പോഴും ഓർമ്മിപ്പച്ചിരുന്ന കാര്യങ്ങളെക്കുറിച്ച് ദുൽഖർ സൽമാൻ ഒരിക്കൽ പറയുകയുണ്ടായി.

"വാപ്പച്ചി ഭാഗ്യവാനാണ്, അദ്ദേഹം ഒരുപാട് കാര്യങ്ങൾ നേടിയിട്ടുണ്ട്; എന്നാൽ ഇപ്പോൾ അനുഭവിക്കുന്ന ഈ ആർഭാടത്തിൽ മുഴുകി നിങ്ങൾ ജീവിക്കരുത് എന്ന് ഉമ്മച്ചി എപ്പോഴും ഞങ്ങളോട് പറയുമായിരുന്നു," എന്ന് ദുൽഖർ ഓർക്കുന്നു. 

ഈ കർശനമായ ശീലങ്ങളാണ് ഇരുവരെയും നല്ല സംസ്കാരമുള്ളവരായി മാറ്റിയത്.

സുറുമി മമ്മൂട്ടി: ചിത്രകലയിലെ വൈഭവം, വിവാഹ ക്ഷണക്കത്തും ബിസിനസ്സ് അനുഭവവും

മമ്മൂട്ടിയുടെ മകൾ സുറുമി ക്യാമറയ്ക്ക് മുന്നിലെ അഭിനയത്തിന് പകരം വരകളുടെ ലോകമാണ് തന്റെ താല്പര്യമായി തിരഞ്ഞെടുത്തത്. ചെന്നൈയിലെ പ്രശസ്തമായ സ്റ്റെല്ല മാരിസ് കോളേജിൽ നിന്ന് ഫൈൻ ആർട്സിൽ ബിരുദവും, ലണ്ടനിലെ ചെൽസി കോളേജ് ഓഫ് ആർട്സിൽ നിന്ന് ബിരുദാനന്തര ബിരുദവും സുറുമി കരസ്ഥമാക്കിയിട്ടുണ്ട്.

ചിത്രകാരി എന്ന നിലയിലും റയ ഹെൽത്ത്കെയർ പ്രൈവറ്റ് ലിമിറ്റഡ് എന്ന സ്ഥാപനത്തിന്റെ ഡയറക്ടർ എന്ന നിലയിലുമുള്ള മികച്ച പഠന പശ്ചാത്തലമാണ് സുറുമിക്കുള്ളത്. തന്റെ വിവാഹത്തിന്റെ ക്ഷണക്കത്ത് പൂർണ്ണമായും സ്വന്തം കൈകൊണ്ട് വരച്ച് രൂപകൽപ്പന ചെയ്തുകൊണ്ട് സുറുമി തന്റെ കലാപരമായ കഴിവ് തെളിയിച്ചു. പ്രകൃതി ദൃശ്യങ്ങളും മമ്മൂട്ടിയുടെ പോർട്രെയ്റ്റും അടക്കം സുറുമി വരച്ച ചിത്രങ്ങൾ പ്രശസ്തമായ ആർട്ട് ഫെസ്റ്റിവലുകളിൽ ഉയർന്ന വിലയ്ക്ക് വിറ്റുപോയിട്ടുണ്ട്. 

സുറുമിയുടെ വിവാഹദിവസവുമായി ബന്ധപ്പെട്ട് മലയാളികൾ ഓർക്കുന്ന മറ്റൊരു ചരിത്രമുണ്ട്. സുറുമിയുടെ വിവാഹം നിശ്ചയിച്ചിരുന്ന ദിവസം ഇടതുപക്ഷ സംഘടനകൾ രാജ്യവ്യാപകമായി അഖിലേന്ത്യാ ബന്ദ് ആഹ്വാനം ചെയ്തിരുന്നു. എന്നാൽ കേരളത്തിൽ മമ്മൂട്ടിയോടുള്ള ആദരവും സ്നേഹവും കാരണം അന്നത്തെ സി.പി.ഐ.എം. നേതൃത്വം മുൻകൈയെടുത്ത് ആ ബന്ദ് കേരളത്തിൽ കർശനമായി നടത്താതെയും ഹർത്താലാക്കി മാറ്റാതെയും അദ്ദേഹത്തെ ഏറെ സഹായിക്കുകയുണ്ടായി. രാഷ്ട്രീയത്തിനതീതമായി മമ്മൂട്ടി എന്ന വ്യക്തിക്ക് സമൂഹത്തിലുള്ള വലിയ സ്വാധീനത്തിന്റെ തെളിവായിരുന്നു അത്.

എങ്കിലും അഭിനയത്തിലും കാരുണ്യ പ്രവർത്തനങ്ങളിലും വിജയം കൈവരിച്ച മമ്മൂട്ടിക്ക് കച്ചവടം അഥവാ ബിസിനസ്സ് എന്നത് ജീവിതത്തിൽ ഒട്ടും പറഞ്ഞിട്ടുള്ള കാര്യമല്ല. മകൾക്ക് വേണ്ടി ദുബായിൽ അദ്ദേഹം 'എച്ച്.ടു.ഒ.' എന്ന പേരിൽ ഒരു പരസ്യ കമ്പനി ആരംഭിച്ചിരുന്നു എങ്കിലും ആ സംരംഭം വെള്ളത്തിലാവുകയും സാമ്പത്തികമായി നഷ്ടത്തിലാവുകയും ചെയ്യുകയാണുണ്ടായത്. 

ചെന്നൈ സ്വദേശിയായ പ്രശസ്ത കാർഡിയോതൊറാസിക് സർജൻ ഡോ. മുഹമ്മദ് റേഹൻ സയീദാണ് സുറുമിയുടെ ഭർത്താവ്. ചെന്നൈ ആസ്ഥാനമായുള്ള അത്യന്തം മാന്യവും ഉന്നതവുമായ ഒരു തമിഴ് കുടുംബത്തിലാണ് ഡോ. റേഹൻ സയീദ് ജനിച്ചു വളർന്നത്. ചെന്നൈ മദ്രാസ് മെഡിക്കൽ കോളേജിൽ നിന്ന് പ്രശസ്തമായ രീതിയിൽ വൈദ്യശാസ്ത്ര ബിരുദം നേടിയ അദ്ദേഹം പിന്നീട് ലണ്ടനിലെ റോയൽ കോളേജ് ഓഫ് സർജൻസിൽ നിന്നും ഹാർവാർഡ് മെഡിക്കൽ സ്കൂളിൽ നിന്നുമാണ് വിദേശ ഉപരിപഠനം പൂർത്തിയാക്കിയത്. 

ഇന്ത്യയിൽ റോബോട്ടിക് ചികിത്സയിലും എൻഡോസ്കോപ്പിക് ഹാർട്ട് സർജറിയിലും നിരവധി റെക്കോർഡുകൾ സ്ഥാപിച്ച വ്യക്തിയാണ് ഡോ. റേഹൻ. നിലവിൽ ബംഗളൂരു, ചെന്നൈ, ഹൈദരാബാദ് തുടങ്ങിയ നഗരങ്ങൾ കേന്ദ്രീകരിച്ച് "മദർഹുഡ് ഹോസ്പിറ്റൽസ്" (റയ ഹെൽത്ത്കെയർ പ്രൈവറ്റ് ലിമിറ്റഡ്) എന്ന പേരിൽ പ്രശസ്തമായ ഗൈനക്കോളജി-മറ്റേർണിറ്റി ആശുപത്രി ശൃംഖല ഇരുവരും ചേർന്ന് വിജയകരമായി നടത്തുന്നു. ഈ ഹോസ്പിറ്റൽ ഗ്രൂപ്പിന്റെ സ്ഥാപനത്തിലും വിജയത്തിലും സുറുമിയും ഡോ. റേഹനും ഒപ്പം മമ്മൂട്ടിയുടെ വലിയ സാമ്പത്തിക പിന്തുണയും നിക്ഷേപവുമുണ്ടായിരുന്നു. 

മകൾ സുറുമി മമ്മൂട്ടി ചിത്രകാരിയും റയ ഹെൽത്ത്കെയർ പ്രൈവറ്റ് ലിമിറ്റഡ് എന്ന സ്ഥാപനത്തിന്റെ ഡയറക്ടറുമാണ്. ചെന്നൈയിലെ സ്റ്റെല്ല മാരിസ് കോളേജിൽ നിന്നും ലണ്ടനിലെ ചെൽസി കോളേജിൽ നിന്നുമാണ് സുറുമി വിദ്യാഭ്യാസം പൂർത്തിയാക്കിയത്. അവരുടേ ഭർത്താവായ ഡോ. മുഹമ്മദ് റേഹൻ സയീദ് ഒരു പ്രമുഖ കാർഡിയോതൊറാസിക് സർജനാണ്. മദ്രാസ് മെഡിക്കൽ കോളേജ് പൂർവ്വവിദ്യാർത്ഥിയായ അദ്ദേഹം ചെന്നൈയിലെ ഉയർന്ന തമിഴ് പശ്ചാത്തലമുള്ള കുടുംബാംഗമാണ്. 

ദുൽഖർ സൽമാൻ: വാഹനങ്ങളോടുള്ള ഭ്രമം, മാതാപിതാക്കൾ കണ്ടെത്തിയ വിവാഹബന്ധവും ഡി വാട്ടറിങ് കമ്പനിയും

മമ്മൂട്ടിയുടെ മകനായ ദുൽഖർ സൽമാൻ അമേരിക്കയിലെ പർഡ്യൂ യൂണിവേഴ്സിറ്റിയിൽ നിന്ന് ബിസിനസ് മാനേജ്മെന്റിൽ ബിരുദം നേടിയ ആളാണ്. അമേരിക്കയിൽ പഠിക്കുന്ന കാലം മുതൽക്കേ ദുൽഖറിന് വാഹനങ്ങളോട് കടുത്ത ഭ്രമമുണ്ടായിരുന്നു. ദുൽഖറിന്റെ വാഹന കമ്പത്തിന് പിന്നിൽ ഒരു പഴയ കുടുംബ കഥയുണ്ട്. ഒമാനിൽ വെച്ച് തന്റെ പിതാവിന്റെ സുഹൃത്തിന്റെ പോർഷെ 944 കണ്ടതാണ് ദുൽഖറിന് കാറുകളോട് ഭ്രാന്ത് വരാൻ കാരണം.

90-കളുടെ മധ്യത്തിൽ രണ്ട് മക്കളുമുള്ളതുകൊണ്ട് കുടുംബ യാത്രയ്ക്കായി ഒരു പോർഷെ 911 വാങ്ങേണ്ട എന്ന് മമ്മൂട്ടി തീരുമാനിച്ചപ്പോൾ ദുൽഖറിന് വലിയ നിരാശ തോന്നിയിരുന്നു. എന്നാൽ പിന്നീട് വലിയ വിജയങ്ങൾ സ്വന്തമാക്കിയ ദുൽഖർ തന്റെ ഗാരേജിൽ ഒട്ടനവധി ലക്ഷ്വറി സ്പോർട്സ് കാറുകൾ എത്തിച്ചു. 

ദുൽഖറിന്റെ ഗാരേജിലുള്ള ഓരോ വാഹനങ്ങൾക്കും അദ്ദേഹത്തിന്റെ ഹൃദയത്തിൽ പ്രത്യേക സ്ഥാനമാണുള്ളത്. ഇതിൽ ഒന്നാമത്തേത് ബി.എം.ഡബ്ല്യു. എം3 ഇ46 എന്ന 2002 മോഡൽ കാറാണ്.

തന്റെ കാർ കളക്ഷനിലെ ഏറ്റവും പ്രിയപ്പെട്ട 'കിരീടത്തിലെ പൊൻതൂവൽ' എന്നാണ് ദുൽഖർ ഈ വാഹനത്തെ വിശേഷിപ്പിക്കുന്നത്. ഈ വണ്ടിയിൽ ഒരു ചെറിയ പോറലെങ്കിലും വീഴുമോ എന്ന് ഓർത്ത് കടുത്ത പേടിയുണ്ടെന്നും, വണ്ടിക്ക് എന്തെങ്കിലും സംഭവിക്കുന്നതായി താൻ സ്വപ്നം കണ്ട് ഭയന്ന് ഉണരാറുണ്ടെന്നും ദുൽഖർ തുറന്നുപറഞ്ഞിട്ടുണ്ട്. 

അടുത്തത് പോർഷെ 911 ജി.ടി.3 എന്ന 991.2 സീരീസിലുള്ള സ്പോർട്സ് കാറാണ്. ട്രാക്കുകളിൽ വന്യമായ കരുത്ത് പുറത്തെടുക്കുന്ന ഈ കാറിൽ ഇന്ത്യയിലെ ഇന്ധനത്തിന്റെ ഗുണനിലവാരത്തെക്കുറിച്ച് കടുത്ത ഭയമുള്ളതുകൊണ്ട് താൻ ഇത് ദീർഘദൂര യാത്രകൾക്ക് ഒട്ടും ഉപയോഗിക്കാറില്ലെന്ന് ദുൽഖർ വ്യക്തമാക്കുന്നു. 

ദുൽഖറിന്റെ കളക്ഷനിലെ ഏറ്റവും വിലയേറിയ സൂപ്പർകാറാണ് ഫെരാരി 296 ജി.ടി.ബി എന്ന ഹൈബ്രിഡ് മോഡൽ വാഹനം. ഏകദേശം 5.8 കോടി രൂപ വിലമതിക്കുന്ന ഈ അത്യാധുനിക വാഹനം കേരളത്തിലെ റോഡുകളിലൂടെ ദുൽഖർ ഓടിച്ചുപോകുമ്പോൾ ആരാധകർ ഏറെ കൗതുകത്തോടെയാണ് നോക്കിനിൽക്കാറുള്ളത്. 

കളക്ഷനിലെ മറ്റൊരു വിസ്മയമാണ് മെഴ്‌സിഡസ് ബെൻസ് എസ്.എ.ൽ.എസ്. എ.എം.ജി. എന്ന പ്രശസ്തമായ ലക്ഷ്വറി വാഹനം. കൈകൊണ്ട് നിർമ്മിച്ച ശക്തമായ വി8 എൻജിൻ ഘടിപ്പിച്ച ഈ വണ്ടിയെ ഭാവിയിലെ വലിയൊരു ക്ലാസിക് വാഹനമായിട്ടാണ് ദുൽഖർ സൽമാൻ വിശേഷിപ്പിക്കുന്നത്. 

മകൾക്കായി പരസ്യക്കമ്പനി തുടങ്ങിയതുപോലെ മകനുവേണ്ടിയും ദുബായിൽ ഒരു വലിയ വ്യവസായത്തിന് മമ്മൂട്ടി പദ്ധതിയിട്ടിരുന്നു. വലിയ കെട്ടിടങ്ങൾ നിർമ്മിക്കുമ്പോൾ അസ്ഥിവാരം താഴ്ത്തുമ്പോൾ ഉണ്ടാകുന്ന വെള്ളം പമ്പ് ചെയ്തു കളയുന്ന 'ഡി വാട്ടറിങ്' കമ്പനിയാണ് ദുൽഖറിനായി മമ്മൂട്ടി തുടങ്ങിക്കൊടുത്തത്. എന്നാൽ കൗതുകകരമെന്നു പറയട്ടെ, മമ്മൂട്ടിയുടെ ജാതകത്തിൽ കച്ചവടം ഇല്ലാത്തതുകൊണ്ടാവാം, വെള്ളം വറ്റിക്കുന്ന ആ ഡി വാട്ടറിങ് കമ്പനിയും ഒടുവിൽ വെള്ളത്തിലായി.

ദുൽഖറിന്റെ വിവാഹം തികച്ചും മാതാപിതാക്കൾ തിരഞ്ഞു കണ്ടെത്തിയ ഒന്നായിരുന്നു. സ്കൂൾ ജൂനിയറായിരുന്ന അമാൽ സൂഫിയയാണ് ദുൽഖറിന്റെ ജീവിതപങ്കാളിയായത്. ചെന്നൈയിൽ സ്ഥിരതാമസമാക്കിയ അതിപ്രശസ്തമായ ഒരു ഉത്തരേന്ത്യൻ മുസ്‌ലിം കുടുംബാംഗമാണ് അമാൽ സൂഫിയ. ചെന്നൈയിലെ പ്രമുഖ കോടീശ്വരനും വ്യവസായ പ്രമുഖനുമായ സയ്യിദ് നിസാമുദ്ദീന്റെ മകളാണ് അമാൽ. ആർക്കിടെക്റ്റും ഇന്റീരിയർ ഡിസൈനറുമായ അമാലിനെ പല പൊതുവേദികളിലും കണ്ടുമുട്ടിയ സുൽഫത്താണ് ഈ ആലോചനയ്ക്ക് അന്തിമ അംഗീകാരം നൽകിയത്. 2011 ഡിസംബറിലായിരുന്നു ഇരുവരുടെയും വിവാഹം. 

മരുമക്കളുടെ തിരഞ്ഞെടുപ്പും ചെന്നൈ ബന്ധവും: കണിശമായ മാനദണ്ഡങ്ങൾ

മമ്മൂട്ടി തന്റെ മകൾക്ക് അനുയോജ്യനായ മരുമകനെയും മകന് അനുയോജ്യയായ മരുമകളെയും തിരഞ്ഞെടുത്തതിന് പിന്നിൽ അദ്ദേഹത്തിന്റേതായ കണിശമായ ചില തത്വങ്ങളും ദർശനങ്ങളും ഉണ്ടായിരുന്നു. കേവലം പണക്കൊഴുപ്പിനോ സിനിമയിലെ പ്രശസ്തിക്കോ പ്രാധാന്യം നൽകേണ്ടതില്ല എന്ന ഉറച്ച നിലപാടായിരുന്നു അദ്ദേഹത്തിന്. മറിച്ച്, കുടുംബത്തിന്റെ അന്തസ്സിനും ഉന്നത വിദ്യാഭ്യാസത്തിനും മാത്രമാണ് അദ്ദേഹം എപ്പോഴും മുൻഗണന നൽകിയത്. 

ചെന്നൈ എന്ന തട്ടകവും മക്കളുടെ വിദ്യാഭ്യാസവും

മമ്മൂട്ടിയുടെ മക്കളായ സുറുമിയും ദുൽഖറും സ്കൂൾ വിദ്യാഭ്യാസത്തിന്റെ വലിയൊരു ഭാഗം പൂർത്തിയാക്കിയത് തമിഴ്നാട്ടിലെ ചെന്നൈയിലാണ്. തമിഴ്നാടുമായുള്ള ഈ സുദീർഘമായ ബന്ധം കാരണം മമ്മൂട്ടിക്ക് ചെന്നൈയിൽ സ്വന്തമായി ഒരു വസതിയുണ്ടായിരുന്നു; ചെന്നൈയിലെ അദ്ദേഹത്തിന്റെ ഈ വസതിയാണ് 'സലാമത്ത്'.

ചെന്നൈയിലെ മാന്യവും ഉന്നതവുമായ സാമൂഹിക വൃത്തങ്ങളിൽ മമ്മൂട്ടിയും അദ്ദേഹത്തിന്റെ കുടുംബവും ഏറെ സജീവമായിരുന്നു. തങ്ങൾക്ക് പൂർണ്ണമായും വിശ്വാസമുള്ളതും വർഷങ്ങളായി നന്നായി അറിയാവുന്നതുമായ ചെന്നൈയിലെ സുഹൃദ്‌വലയങ്ങളിൽ നിന്നും മാന്യമായ കുടുംബങ്ങളിൽ നിന്നുമാണ് മക്കളുടെ രണ്ട് വിവാഹാലോചനകളും അദ്ദേഹം സ്വീകരിച്ചത്. 

പണത്തേക്കാൾ പ്രാധാന്യം കുടുംബ മഹിമയ്ക്കും പശ്ചാത്തലത്തിനും

മരുമകൾ അമാൽ സൂഫിയയുടെ കുടുംബവും മരുമകൻ ഡോ. റേഹൻ സയീദിന്റെ കുടുംബവും സാമ്പത്തികമായി വലിയ ഭദ്രതയുള്ളവരാണ്. അമാലിന്റെ പിതാവ് ചെന്നൈയിലെ അതിപ്രശസ്തനായ വ്യവസായിയായ സയ്യിദ് നിസാമുദ്ദീനാണ്; ഡോ. റേഹൻ ചെന്നൈയിലെ അതിമാന്യമായ തമിഴ് കുടുംബ പശ്ചാത്തലത്തിൽ നിന്നുള്ളയാളാണ്. എങ്കിലും മമ്മൂട്ടി ഈ ആലോചനകൾ സ്വീകരിച്ചത് കേവലം അവരുടെ പണവും പ്രതാപവും കണ്ടല്ല, മറിച്ച് തലമുറകളായി അവർ കാത്തുസൂക്ഷിക്കുന്ന സഭ്യതയും അച്ചടക്കവും വിനയവുമുള്ള കുടുംബ പശ്ചാത്തലം നോക്കിയാണ്. 

വിദ്യാഭ്യാസത്തിന് ഒന്നാം സ്ഥാനം

മക്കൾക്കായി പങ്കാളികളെ തിരഞ്ഞെടുത്തപ്പോൾ മമ്മൂട്ടി ഏറ്റവും കൂടുതൽ പ്രാധാന്യം നൽകിയത് ഉന്നത വിദ്യാഭ്യാസ യോഗ്യതയ്ക്കായിരുന്നു. മകൾ സുറുമിയുടെ ഭർത്താവ് ഡോ. മുഹമ്മദ് റേഹൻ സയീദ് ഇന്ത്യയിലെയും അന്താരാഷ്ട്ര തലത്തിലെയും പ്രശസ്തനായ കാർഡിയോതൊറാസിക് സർജനാണ്.

ചെന്നൈ മദ്രാസ് മെഡിക്കൽ കോളേജ്, ലണ്ടനിലെ റോയൽ കോളേജ് ഓഫ് സർജൻസ്, ഹാർവാർഡ് മെഡിക്കൽ സ്കൂൾ എന്നിവിടങ്ങളിൽ നിന്നാണ് അദ്ദേഹം തന്റെ ഉപരിപഠനം പൂർത്തിയാക്കിയത്. ദുൽഖറിന്റെ പങ്കാളിയായ അമാൽ സൂഫിയ ചെന്നൈയിൽ നിന്ന് ആർക്കിടെക്ചർ ബിരുദം നേടിയ സമർത്ഥയായ ഒരു ഡിസൈനറാണ്. 

സിനിമാ ലോകത്തിന് പുറത്തുള്ള ലളിത ജീവിതം

തന്റെ മരുമക്കൾ രണ്ടുപേരും സിനിമാ മേഖലയുമായി യാതൊരു ബന്ധവുമില്ലാത്തവരായിരിക്കണം എന്ന കണിശമായ നിലപാട് മമ്മൂട്ടിക്കുണ്ടായിരുന്നു. ചലച്ചിത്ര ലോകത്തിന്റെ തിളക്കവും ആർഭാടങ്ങളുമില്ലാത്ത ലളിതമായ ജീവിതരീതി നയിക്കുന്നവരാണ് ഡോ. റേഹനും അമാൽ സൂഫിയയും. ദുൽഖർ വലിയൊരു പാൻ-ഇന്ത്യൻ താരമാണെങ്കിലും ഭാര്യ അമാൽ എപ്പോഴും ക്യാമറക്കണ്ണുകളിൽ നിന്നും മാധ്യമങ്ങളിൽ നിന്നും അകന്ന് ലളിതമായി ജീവിക്കാൻ ഇഷ്ടപ്പെടുന്ന വ്യക്തിയാണെന്ന് ദുൽഖർ സാക്ഷ്യപ്പെടുത്തിയിട്ടുണ്ട്. 

സ്ഥിരതയും ഉത്തരവാദിത്തബോധവും

മകൻ ദുൽഖർ സൽമാൻ സിനിമയിലേക്ക് ചുവടുവെക്കുന്നതിന് മുൻപ് തന്നെ ദുൽഖറിന്റെ വിവാഹം നടത്താൻ മമ്മൂട്ടി നിശ്ചയിച്ചിരുന്നു. ചെറുപ്രായത്തിലുള്ള വിവാഹം ഒരു മനുഷ്യന്റെ ജീവിതത്തിൽ കൂടുതൽ ഉത്തരവാദിത്തബോധവും സ്ഥിരതയും നൽകുമെന്നും, സിനിമാ മേഖലയിലെ അനാവശ്യ ഗോസിപ്പുകളിലും വിവാദങ്ങളിലും പെടാതെ തന്റെ കരിയറിലേക്ക് പൂർണ്ണമായും ശ്രദ്ധ കേന്ദ്രീകരിക്കാൻ ഇത് ദുൽഖറിനെ സഹായിക്കുമെന്നും മമ്മൂട്ടി വിശ്വസിച്ചു. 

പങ്കാളി തിരഞ്ഞെടുപ്പിൽ ഭാര്യ സുൽഫത്തിന്റെ താല്പര്യം

മകനായി പങ്കാളിയെ കണ്ടെത്തുന്നതിൽ മമ്മൂട്ടിയേക്കാൾ വലിയ പങ്കുവഹിച്ചത് അദ്ദേഹത്തിന്റെ പ്രിയതമ സുൽഫത്തായിരുന്നു. സ്കൂൾ ജൂനിയറായിരുന്ന അമാൽ സൂഫിയയുടെ പേര് സുഹൃത്തുക്കൾ നിർദ്ദേശിച്ചപ്പോൾ, പല പൊതുവേദികളിലും അമാലിനെ നേരിട്ട് കണ്ട് സംസാരിച്ച സുൽഫത്താണ് അമാലിന്റെ വിനയവും പെരുമാറ്റരീതികളും കണ്ട് ഈ ആലോചനയ്ക്ക് അന്തിമമായ അംഗീകാരം നൽകിയത്. 

മതവും സൌന്ദര്യവും

ബാഹ്യമായ സൗന്ദര്യത്തിനേക്കാൾ മനസ്സിലെ വിനയത്തിനും പ്രൗഢിയുമാണ് മമ്മൂട്ടി ദമ്പതികൾ തങ്ങളുടെ മരുമക്കളിൽ വിലയിരുത്തിയത്. അതোടൊപ്പം തങ്ങളുടെ അതേ മതവിശ്വാസവും മൂല്യങ്ങളും പുലർത്തുന്ന ഉത്തരേന്ത്യൻ/തമിഴ് മുസ്‌ലിം പശ്ചാത്തലമുള്ള കുടുംബങ്ങളിൽ നിന്നാണ് ഈ രണ്ട് ആലോചനകളും അവർ തിരഞ്ഞെടുത്തത്. 

നിശബ്ദമായ ആത്മബന്ധങ്ങൾ: മമ്മൂട്ടിയുടെ യഥാർത്ഥ സുഹൃത്തുക്കൾ

ബാഹ്യമായ പ്രശസ്തികൾക്കിടയിലും താൻ നെഞ്ചോട് ചേർത്തുവെക്കുന്ന സൗഹൃദങ്ങൾക്ക് ജീവിതത്തിൽ വലിയ വില നൽകുന്ന വ്യക്തിത്വമാണ് മമ്മൂട്ടിയുടേത്. അദ്ദേഹത്തിന്റെ ജീവിതത്തിൽ ഏറ്റവും അടുത്ത രണ്ട് സുഹൃത്തുക്കളായിരുന്നു ബിസിനസുകാരനായ ഷറഫും എറണാകുളം മുൻ കളക്ടറും കാർഷിക സർവകലാശാല മുൻ വൈസ് ചാൻസലറുമായിരുന്ന കെ. ആർ. വിശ്വംഭരനും.

ഈ കൂട്ടുകെട്ടിന് ഉദ്യോഗസ്ഥ മേൽവിലാസങ്ങളോ സിനിമാ പദവികളോ ബാധകമായിരുന്നില്ല. പതിറ്റാണ്ടുകൾ ഒരുമിച്ച് സഞ്ചരിച്ച തന്റെ പ്രിയ ചങ്ങാതിയായ വിശ്വംഭരന്റെ വിയോഗവേളയിൽ മമ്മൂട്ടി ഏറെ തളർന്നുപോയിരുന്നു. 

വിശ്വംഭരൻ സാറിനെ അവസാനമായി കണ്ട് മടങ്ങിയ ശേഷം മമ്മൂട്ടി വീട്ടിലെത്തി തന്റെ ഹോട്ടൽ മുറിയിലിരുന്ന് കണ്ണീരൊഴുക്കിയത് അദ്ദേഹത്തിന്റെ അടുത്ത കൂട്ടുകാരനായ ആന്റോ ജോസഫ് വികാരാധീനനായി പങ്കുവെച്ചിട്ടുണ്ട്. വിശ്വംഭരൻ അന്തരിച്ച വാർത്തയറിഞ്ഞ് ദുബായിൽ നിന്ന് ആത്മസുഹൃത്ത് ഷറഫിന്റെ വീഡിയോ കോൾ വന്നപ്പോൾ മമ്മൂട്ടി വിതുമ്പിക്കരഞ്ഞത് ഇവർ തമ്മിലുള്ള ആത്മബന്ധത്തിന്റെ ആഴം വെളിപ്പെടുത്തുന്നു. 

നിലവിൽ അദ്ദേഹത്തിന്റെ ഏറ്റവും അടുത്ത സുഹൃത്തുക്കളും വിശ്വസ്തരുമായി ചലച്ചിത്ര മേഖലയിലുള്ളത് പ്രശസ്ത നടനും പാലക്കാട് എം. എൽ. എയുമായ രമേഷ് പിഷാരടിയും നിർമ്മാതാവ് ആന്റോ ജോസഫുമാണ്. ഷൂട്ടിംഗ് തിരക്കുകളിലും സ്വകാര്യ നിമിഷങ്ങളിലും മമ്മൂട്ടിയോടൊപ്പം എപ്പോഴും നിഴലായി സഞ്ചരിക്കുന്നതും പ്രയാസങ്ങളിൽ തണലായി ഒപ്പം നിൽക്കുന്നതും ഇവർ രണ്ടുപേരുമാണ്.

സാമൂഹിക മാധ്യമങ്ങളിൽ മമ്മൂട്ടിയോടൊപ്പം ചിത്രങ്ങളും റീലുകളും പോസ്റ്റ് ചെയ്ത് വലിയ സൗഹൃദം പ്രകടിപ്പിക്കുന്ന ഒട്ടനവധി ആളുകൾ ഉണ്ടെങ്കിലും, അതെല്ലാം കേവലം വെർച്വൽ ലോകത്ത് കാണിക്കാനുള്ള കൂട്ടുകാർ മാത്രമാണ്. മമ്മൂട്ടിയുടെ യഥാർത്ഥ ജീവിതത്തിലെ ആത്മാർത്ഥതയുള്ള അടുത്ത കൂട്ടുകാർ രമേഷ് പിഷാരടിയും ആന്റോ ജോസഫും തന്നെയാണ്. 

സ്നേഹവും ആശങ്കയും: ഒരു വിലയിരുത്തൽ

മമ്മൂട്ടിയുടെ കുടുംബത്തിലെ ഓരോ വ്യക്തിയും തങ്ങളുടെ വ്യക്തിമുദ്ര പതിപ്പിച്ച് വളരെ മനോഹരമായി ജീവിക്കുമ്പോഴും, അദ്ദേഹത്തിന്റെ ആരാധകർക്കും സ്നേഹജനനങ്ങൾക്കും ഒരു ചെറിയ സങ്കടമുണ്ട്. വർഷങ്ങളായി ഗൾഫിലും മറ്റ് വിദേശ രാജ്യങ്ങളിലും മമ്മൂട്ടിയോടൊപ്പം എപ്പോഴും നിഴലായി നടക്കുന്ന ചില വ്യക്തികൾ അദ്ദേഹത്തിന്റെ വലിയ പേരും പ്രശസ്തിയും സ്വന്തം വ്യക്തിപരമായ താല്പര്യങ്ങൾക്കായി ദുരുപയോഗം ചെയ്യാൻ ശ്രമിക്കുന്നു എന്ന പരാതി ഇടയ്ക്കിടെ ഉയരാറുണ്ട്.

ഇത് മാത്രമാണ് ഈ മാതൃകാപരമായ കുടുംബചരിത്രത്തിൽ സ്നേഹമുള്ളവർക്ക് പങ്കുവെക്കാനുള്ള ഏക ആശങ്ക. ഇത് മാറ്റിനിർത്തിയാൽ, പണക്കൊഴുപ്പിലോ പ്രശസ്തിയിലോ സ്വയം മറക്കാതെ പരസ്പരമുള്ള ബഹുമാനവും അച്ചടക്കവും കാത്തുസൂക്ഷിക്കുന്ന ഈ കുടുംബം ചലച്ചിത്ര ലോകത്തിനും സമൂഹത്തിനും ഒരുപോലെ നല്ലൊരു മാതൃകയാണ്।

തൃശൂർക്കാരൻ: