വിജിലന്സില് മനോജ് എബ്രഹാം പ്രഭാവം: ജി.എസ്.ടിയിലെ 'തൊട്ടപ്പന്മാരെ' വിറപ്പിച്ച് പ്രജിനി രാജിന്റെ വീഴ്ച; കോടികളുടെ അഴിമതി ശൃംഖല അഴിയുമ്പോള്...
കൊച്ചി തേവരയിലെ സംസ്ഥാന ജി.എസ്.ടി ജോയിന്റ് കമ്മീഷണര് ഓഫീസിലും വസതിയിലും വിജിലന്സ് നടത്തിയ മിന്നല് പരിശോധന, പരോക്ഷ നികുതി വകുപ്പിന്റെ മറവില് നടന്നിരുന്ന കോടികളുടെ അഴിമതി ശൃംഖലയെയാണ് ഒറ്റയടിക്ക് പുറത്തുകൊണ്ടുവന്നിരിക്കുന്നത്. കേസില് കുടുങ്ങിയ ജോയിന്റ് കമ്മീഷണര് പ്രജിനി രാജിന്റെ ഉന്നത ബന്ധങ്ങളും അനധികൃത സ്വത്ത് സമ്പാദനവുമാണ് ഇപ്പോള് സംസ്ഥാനത്ത് പ്രധാന ചര്ച്ചാവിഷയം.
അഴിമതിയുടെ സാമ്രാജ്യവും വിജിലന്സിന്റെ ശക്തമായ നീക്കവും
ഭരണതലത്തിലെ ഉന്നത സ്വാധീനങ്ങളും രാഷ്ട്രീയ തണലും ഉപയോഗിച്ച് വര്ഷങ്ങളായി തഴച്ചുവളർന്ന അഴിമതി സാമ്രാജ്യമാണ് വിജിലന്സിന്റെ ശക്തമായ നീക്കത്തില് തകര്ന്നടിഞ്ഞിരിക്കുന്നത്. വിജിലന്സ് ഡയറക്ടര് മനോജ് എബ്രഹാമിന്റെ കൃത്യമായ പ്ലാനിംഗും വിട്ടുവീഴ്ചയില്ലാത്ത നിലപാടുകളുമാണ് വകുപ്പിനുള്ളിലെ കറുത്ത ആടുകളെ വലയിലാക്കാന് വഴിയൊരുക്കിയത്.
മുന്പും പ്രജിനി രാജിനെതിരെ ആഭ്യന്തര വിജിലന്സ് റിപ്പോര്ട്ടുകളും വ്യാപാരികളുടെ പരാതികളും ഉയർന്നിരുന്നെങ്കിലും, ഉന്നതതലത്തിലെ കുടപിടിക്കൽ മൂലം അന്വേഷണങ്ങൾ മുങ്ങിപ്പോവുകയായിരുന്നു പതിവ്. എന്നാൽ, വിജിലൻസ് ഡയറക്ടറായി മനോജ് എബ്രഹാം ചുമതലയേറ്റതോടെ അഴിമതിക്കാരായ ഉദ്യോഗസ്ഥർക്ക് മേലുള്ള പിടിമുറുക്കാനും കേസിൽ ആരുടെയും സമ്മർദ്ദത്തിന് വഴങ്ങാതെ അന്വേഷണ സംഘത്തിന് പൂർണ്ണ സ്വാതന്ത്ര്യം നൽകാനും സാധിച്ചു.
ആരാണ് പ്രജിനി രാജ്? ഉദ്യോഗതലത്തിലെ വളർച്ച
ആരാണ് വിജിലന്സിന്റെ പിടിയിലായ പ്രജിനി രാജ് എന്ന ചോദ്യമാണ് ഇപ്പോള് സര്വീസ് മേഖലയിലും പൊതുസമൂഹത്തിലും ഉയര്ന്നുകേള്ക്കുന്നത്. 2005-ല് പി.എസ്.സി വഴി സെയില്സ് ടാക്സ് വകുപ്പിൽ അസിസ്റ്റന്റ് ആയി സര്വീസില് പ്രവേശിച്ച പ്രജിനി, ചുരുങ്ങിയ കാലം കൊണ്ടാണ് വകുപ്പിലെ ഉന്നത പദവികളിലേക്ക് ഉയര്ന്നത്.
സർവീസ് ജീവിതത്തിലുടനീളം തന്ത്രപ്രധാനമായ തസ്തികകൾ കൈയ്യാളാൻ പ്രജിനിക്ക് സാധിച്ചിരുന്നു. പ്രത്യേകിച്ച്, എറണാകുളം ജില്ലയിലെ വൻകിട വ്യവസായ സ്ഥാപനങ്ങളുടെ നികുതി നിർണ്ണയം നടത്തുന്ന സ്പെഷ്യൽ സർക്കിളുകളിൽ ദീർഘകാലം അസസിംഗ് ഓഫീസറായി ഇവർ സേവനമനുഷ്ഠിച്ചു.
തുടർന്ന് 2020-ൽ ജോയിന്റ് കമ്മീഷണറായി സ്ഥാനക്കയറ്റം ലഭിച്ചതോടെ, സംസ്ഥാനത്ത് നടക്കുന്ന നികുതിവെട്ടിപ്പുകളിൽ അന്തിമ നടപടിയെടുക്കാനും അനുമതി നൽകാനുമുള്ള അപരിമിതമായ അധികാരം ഇവരുടെ കൈകളിൽ എത്തിച്ചേരുകയായിരുന്നു. ഇതോടെയാണ് അഴിമതിയുടെ വ്യാപ്തി വർദ്ധിച്ചത്.
മിന്നൽ പരിശോധനയും പിടിച്ചെടുത്ത സമ്പാദ്യവും
തങ്ങൾക്ക് ലഭിച്ച കൃത്യമായ വിവരത്തിന്റെ അടിസ്ഥാനത്തിൽ വിജിലൻസ് സ്പെഷ്യൽ സെൽ കൊച്ചി തേവരയിലുള്ള ജി.എസ്.ടി ജോയിന്റ് കമ്മീഷണറുടെ പ്രധാന ഓഫീസിലും, പ്രജിനിയുടെ ഉടമസ്ഥതയിലുള്ള പച്ചാളം ഇരട്ടക്കുളങ്ങരയിലെ രണ്ട് വീടുകളിലും ശനിയാഴ്ച മിന്നൽ പരിശോധന നടത്തുകയായിരുന്നു.
രാവിലെയോടെ ആരംഭിച്ച മാരത്തോൺ റെയ്ഡിൽ കണക്കിൽപ്പെടാത്ത 14.10 ലക്ഷം രൂപയും 788 യു.എസ് ഡോളറും (ഏകദേശം 75,000 ഇന്ത്യൻ രൂപ) നാല് സ്വർണ്ണനാണയങ്ങളും 190 ഗ്രാം സ്വർണ്ണാഭരണങ്ങളുമാണ് വിജിലൻസ് സംഘം പിടിച്ചെടുത്തത്.
വീട്ടിൽ നിന്നും കണ്ടെടുത്ത വൻ തുക എറണാകുളം സൗത്തിലുള്ള സ്വന്തം ലോഡ്ജിൽ നിന്നുള്ള ലാഭവിഹിതമാണെന്നും, വിദേശ കറൻസി യാത്രാ ആവശ്യത്തിന് കരുതിയതാണെന്നുമുള്ള പ്രജിനിയുടെ വാദം പച്ചക്കള്ളമാണെന്ന് പ്രാഥമിക ചോദ്യം ചെയ്യലിൽ തന്നെ അന്വേഷണ സംഘം ഉറപ്പിച്ചു.
രഹസ്യ കത്തും അനധികൃത സ്വത്ത് സമ്പാദനത്തിന്റെ ചുരുളഴിക്കലും
ഈ വൻ തട്ടിപ്പിന്റെ ചുരുളഴിയാൻ കാരണമായത് വിജിലൻസിന് ലഭിച്ച ഒരു രഹസ്യ കത്തായിരുന്നു. ഒരു അഭിഭാഷകന്റെ പേരിൽ എത്തിയ ആ കത്തിലെ വിവരങ്ങൾ വ്യാജ പേരിൽ ഉള്ളതായിരുന്നുവെങ്കിലും, അതിൽ ചൂണ്ടിക്കാണിച്ചിരുന്ന വിവരങ്ങൾ വിജിലൻസ് ഡയറക്ടർ അതീവ ഗൗരവത്തോടെയാണ് കണ്ടത്. കത്ത് ചവറ്റുകുട്ടയിലെറിയാതെ അതിന്മേൽ രഹസ്യ നിരീക്ഷണം നടത്താൻ വിജിലൻസ് ഡയറക്ടർ ഉത്തരവിടുകയായിരുന്നു.
ആ കത്തിന്റെ അടിസ്ഥാനത്തിൽ വിജിലൻസ് നടത്തിയ രഹസ്യ അന്വേഷണത്തിൽ, 2014 മുതൽ 2024 വരെയുള്ള പത്ത് വർഷക്കാലയളവിൽ പ്രജിനി രാജ് രണ്ടേമുക്കാൽ കോടിയോളം രൂപയുടെ അനധികൃത സ്വത്ത് സമ്പാദിച്ചതായി കണ്ടെത്തുകയായിരുന്നു. കൃത്യമായ ഡിജിറ്റൽ വിവരശേഖരണത്തിലൂടെയാണ് വിജിലൻസ് ഈ കണ്ടെത്തലിൽ എത്തിയത്.
കൊച്ചി നഗരത്തിലെ പ്രമുഖ ബാർ ഹോട്ടലുകളിലെ ജി.എസ്.ടി റിട്ടേണുകളും അവരുടെ യഥാർത്ഥ വിറ്റുവരവും തമ്മിൽ ഭീമമായ വ്യത്യാസമുണ്ടെന്ന് കണ്ടിട്ടും നടപടിയെടുക്കാതെ വൻതുക കൈക്കൂലി വാങ്ങി കേസ് ഒതുക്കിത്തീർക്കുകയായിരുന്നു ഇവരുടെ പ്രധാന രീതി. ബാർ ഹോട്ടലുകൾക്ക് പുറമെ നഗരത്തിലെ വൻകിട ടെക്സ്റ്റൈൽ-ജ്വല്ലറി ഗ്രൂപ്പുകൾ, നിർമ്മാണ മേഖലയിലെ പ്രമുഖർ എന്നിവരിൽ നിന്നും മാസം തോറും കൃത്യമായി വൻ തുക പ്രതിഫലമായി കൈപ്പറ്റി നികുതിവെട്ടിപ്പിന് ഇവർ കൂട്ടുനിന്നു.
രാഷ്ട്രീയ കുടുമാറ്റവും കളംമാറ്റവവും പാളിയപ്പോൾ
വിജിലൻസ് അന്വേഷണം തനിക്കെതിരെ മുറുകുന്നു എന്ന് മനസ്സിലാക്കിയതോടെ രക്ഷപ്പെടാൻ പ്രജിനി രാജ് രാഷ്ട്രീയ-സർവീസ് സംഘടനകളുടെ തണൽ തിരയുകയായിരുന്നു. ദീർഘകാലം ഭരണാനുകൂല ഇടതു സംഘടനയായ കേരള ഗസറ്റഡ് ഓഫീസേഴ്സ് അസോസിയേഷൻ (KGOA) അംഗമായിരുന്നു ഇവർ.
എന്നാൽ, സ്വത്ത് വിവരം വ്യക്തമാക്കാൻ വിജിലൻസ് നൽകിയ അഞ്ച് നോട്ടീസുകൾക്കും തൃപ്തികരമായ മറുപടി നൽകാൻ കഴിയാതെ വന്നതോടെ, സർവീസ് സ്വാധീനം ഉപയോഗിച്ച് കേസ് ഒതുക്കാൻ ഈ മാസം ഏഴാം തീയതി കോൺഗ്രസ് അനുകൂല സംഘടനയായ കെ.ജി.ഒ.യു-വിൽ (KGOU) അംഗത്വം എടുത്തു.
പ്രജിനിയുടെ വസതിയിൽ റെയ്ഡ് നടക്കുകയും വിജിലൻസ് എഫ്.ഐ.ആർ സമർപ്പിക്കുകയും ചെയ്തതോടെ കെ.ജി.ഒ.യു ഇവരുടെ അംഗത്വം സസ്പെൻഡ് ചെയ്യുകയായിരുന്നു. കേസുകളിൽ രാഷ്ട്രീയ ഇടപെടൽ അനുവദിക്കില്ലെന്ന വിജിലൻസ് ഡയറക്ടറുടെ കടുത്ത നിലപാടോടെ പ്രജിനിയുടെ രാഷ്ട്രീയ കുടുമാറ്റം പൂർണ്ണമായും പാളിപ്പോയി.
ഉദ്യോഗസ്ഥ അവിശുദ്ധ കൂട്ടുകെട്ടിലേക്ക് അടുത്ത ലക്ഷ്യം
എറണാകുളത്തെ തന്ത്രപ്രധാനമായ പദവികളിൽ ദീർഘകാലം തുടരാൻ പ്രജിനിക്ക് സാധിച്ചത് വകുപ്പിലെ വടക്കൻ മേഖലയിലെയും ആസ്ഥാനത്തെയും ചില മുതിർന്ന ഐ.എ.എസ് ഉദ്യോഗസ്ഥരുടെയും ജി.എസ്.ടി ഉന്നതരുടെയും അവിശുദ്ധ കൂട്ടുകെട്ട് കാരണമാണെന്നും വിജിലൻസ് വിലയിരുത്തുന്നു. ഇത്തരക്കാരുടെ പട്ടിക വിജിലൻസ് ഇതിനോടകം തയ്യാറാക്കിക്കഴിഞ്ഞു.
വിജിലൻസ് സ്പെഷ്യൽ സെൽ എസ്.പി എം.ജെ. സോജൻ, ഡിവൈ.എസ്.പി എ.എൽ. യേശുദാസ് എന്നിവരുടെ നേതൃത്വത്തിലുള്ള സംഘമാണ് മൂവാറ്റുപുഴ വിജിലൻസ് കോടതിയുടെ വാറന്റോടെ റെയ്ഡിന് നേതൃത്വം നൽകിയത്. ഡയറക്ടറുടെ അടിയന്തര ഇടപെടലുകളും നിരീക്ഷണവുമാണ് അന്വേഷണത്തിന് കൃത്യമായ വേഗത നൽകിയത്.
പ്രജിനിയുടെ കസ്റ്റഡിയിലുള്ള ഡയറികൾ, ബാങ്ക് അക്കൗണ്ട് രേഖകൾ, വാട്സ്ആപ്പ് സംഭാഷണങ്ങൾ എന്നിവ കേന്ദ്രീകരിച്ച് വിജിലൻസ് ചോദ്യം ചെയ്യൽ തുടരുകയാണ്. ഇന്റലിജൻസ് ഫയലുകളിൽ നടത്തിയ കൃത്രിമത്വങ്ങൾ അറിയാൻ ഫോറൻസിക് പരിശോധനയും വരും ദിവസങ്ങളിൽ നടക്കും.
സംസ്ഥാന ഖജനാവിലേക്ക് എത്തേണ്ട കോടിക്കണക്കിന് രൂപയുടെ നികുതിപ്പണമാണ് ഉദ്യോഗസ്ഥ-വ്യവസായി അവിശുദ്ധ കൂട്ടുകെട്ടിലൂടെ ചോർന്നുപോയത്. മനോജ് എബ്രഹാമിന്റെ നേതൃത്വത്തിൽ വിജിലൻസ് നടത്തുന്ന ഈ ശക്തമായ സർജിക്കൽ സ്ട്രൈക്ക്, വരും ദിവസങ്ങളിൽ ഉന്നത ഐ.എ.എസ് ഉദ്യോഗസ്ഥരിലേക്കും ജി.എസ്.ടി ആസ്ഥാനത്തെ വമ്പന്മാരിലേക്കും വ്യാപിപ്പിക്കുന്നതോടെ വകുപ്പിൽ വൻ അറസ്റ്റുകൾക്ക് വഴിതുറക്കുമെന്ന കാര്യത്തിൽ സംശയമില്ല.
സോഷ്യൽ അക്ഷരങ്ങൾ
